Nioqqutissarsiniartarfimmut immikkoortoqarfitsinni naleqartitavut pingaarnertut tunngavigalugit, periusissiap kiisalu nioqqutit assigiinngitsut aqunneqarnerisa ineriartortinneqarlutik atuutsinneqarnissaanni peqataarusuppit?
KNI nioqqutissanik ineriartortitsisussamik (hård nonfood) nioqqutissarsiniartarfimmut immikkoortortoqarfimmut pissarsiorpoq ulloq 1. juni 2026 imaluunniit isumaqatigiissuteqarnikkut sulilersussamik.
KNI-p Qitiusumik kiffartuussiviani nioqqutissarsiniartarfittut immikkoortoqarfia pisiniarfinnut 64-inut kiisalu KNI Engros-imut sullissisuuvoq. Nioqqutissarsiniartartutut akisussaaffik nioqqutinut assigiinngitsunut tunngatillugu pisortanut pingasunut agguataagaavoq, taakkulu akisussaaffigaat nerisassat, atisat kiisalu atortut. Taakku saniatigut atorfeqartuupput nioqqutissanut tunngatillugu suliallit allat, taakkulu nioqqutissanut assigiinngitsunut pisortanut, pisiniarfinnut noqqaasarfinnullu attaveqaataallutik nioqqutissarsiniartarfimmi sulinermi allaffissorluni suliassarpassuarnut akisussaasuusut.
Nioqqutissarsiniartarfimmut immikkoortortaqarfimmiissaatit nioqqutissanut pisortaq qaninnertut pisortarissavat.
Nioqqutissanik ineriartortitsisutut akisussaaffigissavatit:
- Immikkoortortani nioqqutit ineriartortinnissaat pitsanngorsarnissaallu sumiiffinnullu tulluarsarnerinut suleqataaneq makkunani: Hård non-food tassaallutik elektronikkit, piniarnermut aalisarnermullu atortussat, igaffimmi errorsisarfimmilu atortut, sanaartornermut atortut silamilu atortut.
- Nioqqutissanik asigiinngitsunik ineriartortitseqataaneq pitsanngorsaaqataanerlu
- Misigersersuusianik eqquutsitsinissamut periusissiornermilu anguniakkanut suleqataaneq
- KNI-mi naleqartitanik periusissianillu atuutsitsilernissamik aalajangiussisi-maannarnissamillu qulakkeerinninneq
Pingaarnertut suliassatit makkuussapput:
- Nioqqutigisassanik nalilersuineq naleqqussaanerlu
- Naatsorsuineq akilersuinerlu
- Piffissaq eqqorlugu nioqqutit neqeroorutissat tikinnissaat qulakkeerlugu
- Nittarsaassinermik malinnaaffiginninneq
- Noqqaasarfinnut isumaqatigiissutit malinnaaffigalugit
- Nioqqutit immikkoortukkaarlugit nioqqutissarsiniarnissamut missingersuusiorneq
- Pisiniarfiit qanimut attaveqaqatigalugit
Atorfik imaattumik inuttalerusupparput:
- Nioqqutissanut pineqartunut sukumiisumik ilisimasalik
- Nalilersuilluarsinnaasoq kisitsisilerillaqqissorlu
- Attaveqaqatigiillaqqissoq
- Ulluni ulapaarfinni ataatsimut takunnissinnaasoq maluginiagassanillu tappissoq
- Angusaqarluarusuttoq
- Suleqatiginnillaqqissoq / suleqatigiittut sulisartoq
- Eqaatsumik suleriaaseqarlunilu nammineersinnaassuseqartoq.
Qinnuteqartumut eqqortumut neqeroorutigaagut:
- Piginnaasat naapertorlugit immikkut isumaqatigiissuteqarnikkut akissaateqartitaaneq
- Suliffik soqutiginartoq persuarsiorfiunngitsumik ataqatigiiffiusoq, taamaattorli naleqartitatsinnik pingaartitsiviusoq
- Allaffimmi ammaannartumi sulisut nuannaartut tunniusimasullu peqatigalugit sulilissaatit.
Atorfik pillugu paasisaqarnerorusukkuit nioqqutissanut pisortaq Nukappiaaluk Kreutzmann attavigineqarsinnaavoq oqarasuaatikkut: 86 23 11 imaluunniit mailikkut: xnz@kni.gl.
Qinnuteqaat
Qinnuteqaat sukumiisumik tunngavilersugaq, ilinniarsimanermut siusinnerusukkullu sulisimanermut nalunaarsukkanik imalik (CV), oqaaseqaatit aammalu sulisitsisorisimasavit attaveqarfiginissaanut paasissutissaq, tigoreersimassavarput kingusinnerpaamik ulloq 13. maj 2026.
Qinnuteqaat uunga nassiunneqassaaq:
KNI A/S
Sulisoqarnermut immikkoortortaqarfik
Postboks 319
3911 Sisimiut
E-mail: jobs@kni.gl
