KNI-p oqaluttuassartaa

- Ukiuni untritilinni arlalinni Kalaallit Nunaanni niuernermik ingerlatsineq


Piffissap ingerlanerani piumasaqaatinut allanngorartunut naapertuuttumik ukiut 240-t sinnerlugit KNI ineriartortitaasimavoq. Assissaqanngitsumillu oqaluttuarisaanerput 1774-imi, Den Kongelige Grønlandske Handel-imik (KGH-mik) pilersinermik aallaaveqartoq, aamma Kalaallit Nunaata oqaluttuassartaanut pingaaruteqarluinnartumut ilaalluinnartuuvoq.

Naalagaaffiup ingerlataanik KGH-p kisermaassilluni ingerlatsinera, 1950-imi atorunnaarsinneqarpoq. Taamaasilluni KGH-p ingerlatsinera, taamanikkut Kalaallit Nunaannut Ministereqarfimmit pituttugaanngitsumik ingerlanneqalerpoq. Ukiumilu kisermaassilluni ingerlatsinerup atorunnaarfiani Polaroil KGH-p ilagilerpaa kisiannili aamma kalaallit suliffeqarfii ilisimaneqarluartut, soorlu Royal Arctic Line, Air Greenland, Royal Greenland kiisalu Allakkeriveqarneq, ukiut ingerlanerini KGH-p ilagisimavai.

1986-imi KGH Kalaallit Nunaanni Namminersornerullutik Oqartussanit tiguneqarpoq - atserneqarlunilu KNI, tassa Kalaallit Niuerfiat naalisarlugu, toqqaannartumillu qallunaatuunngorlugu isumaqartoq Grønlands Handel.

Illoqarfinni nunaqarfinnilu niuernikkut ingerlanneqartutigut imminut akilersinnaanngitsuni, nioqqutissanik ulluinnarsiutinik taaneqartartunik kalaallit inuiaqatigiit pilersornissaat, KGH-p suliassarpiarigaluarpaa. Ullumikkulli ingerlanneqartut tamakkua pisisartut piumasaqaataannut piffinnilu najugallit sunniutaat naapertorlugit ingerlatsineqarpoq, qanga kisermaassilluni ingerlatseriaatsimut naleqqiunneqarsinnaanngitsumik.

Ullumikkut KNI tassaalersimavoq suliffeqarfik niuernikkut periaatsit nutaaliaasut atorlugit ingerlanneqartoq. Oqaluttuarisaanerput tanngassimaarutigaarput, ukiullu 240-nngulersut oqaluttuarisaanerput sivisooq taanna, ukiunut nutaanut eqqukkusupparput. Taamaasillutalu Kalaallit Nunaanni inuiaqatigiinni inuutissarsiornikkullu qaangerniagassanut annertoqisunut naleqqussarnissatsinnut piffissanngorsimavoq.


 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl