AFS & Efterskolerniartunut tapiisarneq

KNI A/S-imi sulisut qitornaasa nunanut allanut efterskoleriarnerannut AFS-eriarnerannulluunniit tapiisarneq

Ukioq naatsorsuiffiusoq 2015/2016 aallarnerfigalugu KNI A/S-imi sulisut 1000-t missaanniittut periarfissaqalerput qitornamik efterskoleriarnerannut AFS-iluunniit aqqutigalugu nunanut allanut atuariartorniarnerannut ilaannakortumik tamakkiisumilluunniit tapiiffigineqarnissamik qinnuteqarnissamut.

KNI A/S tapiinissamut periarfissiivoq pissutigalugu inuusuttut tassaammata KNI A/S-ip siunissami atorfissaqartilluinnaqqissaagassai. Suliffeqarfiup siunissamini pisariaqartitaanut inuusuttut avaqqunneqarsinnaanngillat, taakkununnga ilaapput inuusuttut avatitsinni najugaqarlutik misiliisimasut taamalu nunatta avataani pisunik malinnaasut. KNI A/S-ip inuiaqatigiinnut sullissinermini aamma ineriartornermut peqataanissi suliassaraa.

Kikkut qinnuteqarsinnaappat?

KNI A/S-imit tapiiffigineqarnissamut qinnuteqarnissamut uku piumasaqaataapput:

  • Angajoqqaat arlaat KNI A/S-imi sulisooreersimassaaq sivikinnerpaamik ukioq ataaseq
  • Meeraq angajoqqaallu aalajangersimasumik Nunatsinni najugaqavissuussapput sivikinnerpaamik ukioq ataaseq, atuarfiusup aallartinnissaa sioqqullugu
  • Meeraq meeqqat atuarfianni 8. kl. ilanngullugu atuarsimassaaq 14-ileereersimassallunilu, taamaattorli 18-nit inorlugit ukioqassalluni
  • Ilaqutariit ukiumut annerpaamik kr. 500.000-nik isertitaqassapput
  • Meeraq Danmarkimi nunaniluunniit allani ilaqutariinnik attaveqaateqassaaq
  • Meeqqat atuarfianniit meeqqamut oqaaseqaatiliortoqarsimassaaq

KNI A/S-ip tapiissutai

Angajoqqaatut nammineq akisussaaffigineqassaaq Namminersorlutik Oqartussanut aammalu Naalagaaffimmut taperneqarnissamik qinnuteqarnissaq, qinnuteqarnerlu akuerineqareerpat KNI A/S tapiisinnaanngussaaq.

Ilinniarnerup aningaasalersorneranut tapiissutinik qinnuteqartoqarsinnaavoq.

Qinnuteqarneq

Meeqqap Danmarkimi efterskolernissani imaluunniit AFS aqqutigalugu nunamut allamut atuariartornissani pimooruppagu, angajoqqaatullu tamakkiisumik tapersersuigaanni kiisalu piumasaqaatinik naammassinnissimagaanni qinnuteqaateqarnissamut KNI A/S kajumissaarivoq kingusinnerpaamik 15. maj internetikkut quppernitsinni immersuivissaq atorlugu: http://www.kni.gl/kl/kni/vores-sponsorater/ansogningsskema/

Apeqquteqarfigineqarsinnaavoq Ineriartortitsinermut immikkoortortaqarfik uunga: ineriartortitasineq@kni.gl oqarasuaat 86 24 44.

KNI A/S-ip suliassaraa pisisartunut, sulisunut, piginnittunut inuiaqatigiinnilu ineriartornermi nuannaarutaasumik niuernermik kiffartuussinissamillu ingerlatsinissaq.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl