KNI A/S-ip aningaasaliiffigisartagai

Nioqqutissanik ikummatissanillu imerpalasunik nuna tamakkerlugu pilersuineq KNI A/S-ip isumagisaraa. Taamatut inuiaqatigiinni suliffeqarfissuup inissisimanera tulluussimaarutigaarput, suliassattalu annertuumik akisussaaffiliinera ilisimaarilluarparput. Nunap siammaseqisup ataqatigiissinnerata saniatigut ingerlatat assigiinngitsut nunatsinnullu iluaqutaasut peqataaffigisarsimavagut peqataaffigalugillu.

KNI A/S-ip aalajangerpaa ukkatarissallugit isumaginninnermut, kulturimut timmersornermullu tunngassuteqartut. Taakku saniatigut aamma peqataaffigisarpagut suliniutit pisussallu assigiinngitsut ataasiakkaat ukkatariniakkatsinnut attuumassuteqarnerat aallaavigalugu.

Aalajangersimasumik aningaasaliiffigineqartartut 

KNI A/S UNICEF Danmarkip aamma Kalaallit Nunaanni Timersoqatigiiffiit Kattuffiata suleqatigiillutik suliniutaannut ’Meeqqat Kalaallit Nunaanni timersornissamut piginnaatitaaffii’-nut aningaasaliisussatut isumaqatigiissuteqarfigai. Suliniut timersornerup silarsuaani meeqqat pitsaanerpaamik toqqissisimanartumillu sinaakkuteqarnissaannik, meeqqat pisinnaatitaaffii aallaavigalugit, siunertaqarpoq.
KNI-p suliniut pissanganartoq, tassa meeqqat inuusuttuaqqallu amerlanerusut toqqissisimanartumik avatangiiseqarlutik tamarmillu inissaqarlutik timersortalernissaat, tapersersorusuppaa.
Aningaasaliisarneq ukiuni pingasuni atuuttussatut isumaqatigiissutigineqarpoq.

KNI-p SSP Arpattartut aningaasaliiffigisarnissaanik 1. januar 2021-miit 2023-p tungaanut atuuttussamik isumaqatigiissuteqarfigaa.

’SSP-mi ujakkaartartut sunngiffitsik atorlugu suliniuteqarnerat KNI-miit nuannaarutigalugulu tapersersorparput. Meeqqat inuusuttullu suliniarfigineqartarneri tapersersorpagut. SSP-mi suliniarneq tapersersorsinnaagatsigu KNI A/S-imiit nuannaarutigaarput.

Ilimmarfimmi ilinniartumut agguaqatigiissillugu qaffasinnerpaamik karakteqarnermigut angusaqarsimasumut KNI A/S ukiut tamaasa kajumissaasiisarpoq 5.000 kroninik aningaasartalimmik. Ilinniagaqarneq nunatta ineriartorneranut siuarsaataavoq pingaarutilik, tamannarpiarlu pissutigalugu ilinniagaqarnissamut ilinniaqqinnissamullu kaammattuiuarnissani KNI A/S-ip pingaartitaraa. 

Avannaata Qimussersuanut ukiumoortumik aalajangersimasumik aningaasaliisarnermigut KNI A/S-ip tulluussimaarutigaa oqaluttuarisaanitsinni pingaarutilerujussuarmut tapersersueqataasinnaagami. Qimusserneq Avannaani Tunumilu nunaqarfinni illoqarfinnilu inussutissarsiornermi suli pingaarutilerujussuuvoq. 

 
KNI A/S-imut pingaaruteqarpoq suliniaqatigiiffiup tapersersornissaa taamaattumillu taanna ukiumut aningaasanik aalajangersimasunik tapiiffigineqartartunut ilaavoq. Ajoraluartumik akornatsinni amerlasuut nappaammik imaannaanngitsumik ilaatigullu inuunermik ulorianartorsiortitsisumik eqqorneqartarput. Eqqorneqartut pillugit ikiuiniarnissamik siunertaqarluni suliniaqatigiiffiup sulineranut suliffeqarfissuup aningaasaliisarnermigut neriuutigaa eqqorneqartut ulluinnarni inuuniarnerat oqinnerulaalersinnaasoq.