KNI A/S-ip Arctic Winter Games 2016 tapersersorpaa

KNI A/S Arctic Winter Games 2016-imut tapersersuisutut aningaasaleeqataanissaa isumaqatigiissutigineqarpoq.

Taamaalilluni KNI A/S AWG2016-imut tapersersuisutut NANOQ sponsoratimik taaneqartumik aningaasaleeqataasunut ilannguppoq.

KNI A/S-ip tapersersuisutut aningaasaliinera marloqiusaavoq. Aningaasanik toqqaannartumik tapiineruvoq aappaatulli sulisumik ukiumi ataatsimi sivisussusilimmik atukkiinerulluni, taamaalilluni tapersersuineq 1 mio. kr.-nit sinnerlugit naleqarluni, taamaalillunilu KNI A/S AWG2016-imut aningaasaliisutut pingaarnertut inissilluni.

KNI A/S-ip pisortaanera Peter Grønvold Samuelsen:

- KNI A/S sinnerlugu tulluusimaarutigalugulu nuannaarutigaara AWG2016-imut aningaasaleeqataasut suliffeqarfiit akornanniileratta. Suliniut angisoorujussuuvoq inuusuttortatsinnullu pingaarutilerujussuulluni. AWG2016 kalaallit inuusuttortatsinnut tamatsinnullumi nunarsuatsinnut alakkaamasaqarnerulernissatsinnik ammaassisuuvoq.

KNI A/S-imi Sulisoqarnermut siunnersorti Inger Eriksen ukioq ataaseq AWG2016-imut atukkiunneqarpoq.

Peter Grønvold Samuelsen:

- Qilanaarutigeqaara AWG2016 ukioq ataaseq qaangiuppat naammassippat sulisutta utertinnissaa, qularutiginngilluinnarparami Ingeri ilisimasaqalersimassallunilu misilittagaqalersimassasoq KNI-mi siunissami iluaqutigillualerumaakkatsinnik.

AWG2016-ip pisortaa Maliina Abelsen:

- KNI A/S-ip tapersersuinerujussua nuannaarutigeqaarput, Inger Eriksen-illu tikilluaqqunissaa ukiumilu aggersumi suleqatiginissaa qilanaareqaarput. AWG2016 suliniut angisoorujussuuvoq piareersarnissaalu nukippassuarnik pisariaqartitsivoq. Taamaattumik ukiumi ataatsimi sulisorisamik pikkorissumik misilittagartuumillu, soorlu ACR-imi aaqqissueqataasartutut, atukkiussineq uagutsinnut isumalerujussuuvoq.