Ataqqinartorsuup Dronningip nersornaasiuttagaanik Fortjenstmedalje-mik sølviusumik Atammimmi saqqarmiuliineq

Anthonette Jakobsen, Atammimmi Niuertoq, 8.december 2015 ataqqinartorsuup Dronninngip nersornaasiuttagaanik sølviusumik saqqarmiulerneqarpoq.

Anthonette_KNIGL_15.png

Anthonette Jakobsen
         

Pilersuisumi pisortaq, Finn Fabricius, tuniniaanermi pisortaq, Arne Lyberth Petersen, saqqarmiuliinermi najuupput. 

Finn Fabricius: 

Asasara Anthonette, asasakka Anthonette-p ilaqutai, asasakka suleqatit, asasakka  takkussimasusi, tamassi tikilluaritsi.

KNI A/S sinnerlugu maani oqalugiarsinnaagama tulluusimaarpunga ataqqinartillugulu. Ulloq manna tamatsinnut assut pingaartuuvoq.

Pisoq pingaarutilik immikkuullarissoq nalliussiniarlutigu katerippugut, taamaattumik ullormik malunnartitsiniarnerput ataatsimoorluta atussagipput pissusissamisoorpoq.

Ullumikkut katerippugut Anthonette Jakobsen-ip ukiorpassuarni KGH-mi/KNI-mi sulisimanerani ataqqiniarlutigu, ataatsimoorpugut kiisalu Ataqqinartorsuup Dronningip nersornaasiuttagaanik saqqarmiulierniarlutigu. KNI-mi suleqatitta taamaattumik saqqarmiulerneqartarnerat qaqutigoortuuvoq, taamaakkaluartoq ukiorpassuarni saqqarmiuliisoqartarnikuulluni. Ataqqinartorsuup Dronningip saqqarmiuliuttagaa kikkunnut tamanut tunniussuunneqartanngilaq, taamaattumik ullumikkut saqqarmiuliisinnaagama assorsuaq nuannaarutigaara.

Asasara Anthonette – KGH-mi/KNI-mi  1. septembari 1972-imili sulileravit ukiorpassuarni sulininni assigiinngitsorpassuarnik suliaqartarsimavutit, sulinerillu assorsuaq sulilluarlutit tunniusimallutillu ingerlassimavat. Taamanikkut sulileqqaaravit pissutsit allaasimaqaat. Taamanikkummi timi atorlugu sulisoqartarpoq nukersorfiullunilu. Sioraasat, qajuusat nioqqutissallu allat poorsuakkaarlutik tikittarmata tamarmik oqimaalutartagaasarnikuupput. Nioqqutit umiarsuakkut tikikkaangata umiarsualivimmiit pisiniarfimmut trillebørinik majuussorneqartarput.

Taamanikkut sulileqqaaravit pisiniarfik kallerup inneqanngilaq – Petromax qaammaqqutigineqartarpoq suullu tamarmik qangatut suliarineqartarlutik, soorlu ullumikkut sungiutiinnakkatsitut qarasaasiaqanngilaq allanillu atortorissaaruteqarani. Taamanikkut ukiup ulluani kingullermi ukiutoqqami 31. decembari naatsorsuisoqartarpoq. Naatsorsuinerlu ingerlanneqartarpoq nioqqutit tamaasa pappiaqqamut allattorneqartarlutik.

1985-imi pisiniarfimmi tullersortinngorputit qaammammusiaqalerlutillu, taamanikkullu niuertoq angalagaangat paarlattaasarlutit. Ukiorpassuarni pisiniarfimmi annertuumik ingerlatseqataareernikuugavit tullersortinngortinneqarnerit pissusissamisuuginnarsimavoq.

2013-imi niuertunngortinneqarputit. Niuertutullu sulinerit assut ingerlalluarpat. Suleqatinnit nuannarineqartuuvutit pisiniarfik inillu allat torersuullutik iseruminartuunissaat pingaartittuarsimavat.Suleqatinnut sulisitsisunnullu unneqqarissuujuarsimavutit. Suleqatinnut, sulisitsisunnut minnerunngitsumillu pisisartunut KGH-p/KNI –p pitsaasumik takutinneqarnissaa isumagiuartarsimavat. Taamaattumik qutsavigerujussuarpatsigit. KNI A/S Pilersuisoq sinnerlugu KGH-mi/KNI-mi ukiorpassuarni sulisimaninnut qutsavigiumavakkit. Ilaquttatit tamaasa aamma qutsavigiumavakka.

Ilaquttavit ukiorpassuarni tapersersortuartarsimassagaatsit qularinngilara. Maannalu KGH-mi/KNI-mi ukiorpassuarni aalajaallutit sulisimaninni  Ataqqinartorsuup Dronningip Nersornaasiuttagaanik sølviusumik saqqarmiulissavakkit.”

 

 

 

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl