Aajukua Arctic Sport Qaarsut atisassai nutaat

Issittumi pinnguaatinik aallussilluartut Arctic Sport Qaarsut atisassatik nutaat tiguaat. KNI Pilersuisoq tapersersuisoralugu timersortartunut aalajaalluinnartunut atisat tunniunneqarput. Qularnanngitsumik pissartanngorniunnissamut marsip qiteqqunnerani Ilulissani ingerlanneqartussami atortussaassavaat.

- Atisartaagut nuannareqaagut tamattalu tullusimaarutigalutigit. Nunaqarfeeqqami 160-nik inoqartumi pingaarutilerujuuvoq taamatut tapersersorteqarnissaq. Aningaasanimmi amerlasuunik katersuiniartarneq ajornakusoortarami, pingaartumik sikusartumiilluni ukiukkut umiarsuakkut angalasinnaaneq ajoratta, oqarpoq timersoqatigiiffimmi siulittaasoq Paornanguaq Kruse.

Issittumi pinnguaatinik pissartanngorniunnissaq Ilulissani ulluni 13.-18. marts ingerlanneqartussaavoq. Arctic Sport Qaarsut 27-nik peqataatitaqartussaavoq, pissartanngorniunnissallu tungaanut atuarfimmi sungiusartarput.

- Qanoq ingerlasoqassanersoq pissanngatigilaarparput. Soorunami neriuutigaarput angusarissaarumaarluta, kingullermimmi pissartanngornikuugatta illersorniartussaassavarput, Paornanguaq Kruse isumalluarpalulluni oqarpoq.

Januaarip 30-ani 2017 KNI A/S-imi pisortaaneq Peter Grønvold Samuelsen Arctic Sport Qaarsunilu siulittaasoq Paornanguaq Kruse peqatigalugu KNI Pilersuisoq pingaarnertut aningaasaliinera atsioqatigiissutigivaat. Taanna pillugu uani atuarneqarsinnaavoq goo.gl/T7CJSw

Pilersuisoq Qaarsuni niuertoq Ane Louise J. Nielsen.

Arctic Sport Qaarsut