Nuugaatsiarmiut Illorsuarmiullu meerartai atuagaasivittaarput

Kingumut KNI A/S Nuugaatsiarmiunut Illorsuarmiunullu tunissuteqaqqippoq, tamatumuuna meerartaanut atualertussanut tunissuteqarluni.

Atuariartornissaannut ulloq ataaseq sioqqullugu sisamanngormat KNI-p tassaarsuarmik eqqugaasut meeqqat angajoqqaavilu  pisiniarfimmut kaffillerfiginiarlugit tunissuteqarfiginiarlugillu qaaqquai.

KNI-p pisortaanerata Peter Grønvold Samuelsen-ip oqaatigaa KNI kingumut Nuugaatsiarmiut Illorsuarmiullu tunissuteqarfigeqqinniarlugit, tamatumuuna tassaarsuaqarnerani eqqugaasut meerartai atualilersut tunissuteqarfigineqarlutik. Uani Qaasuitsup Kommunia suleqatigalugu allattorsimaffiit malillugit tunissuteqartoqarpoq.

- KNI meeqqanut Nuugaatsiarmiunut Illorsuarmiunullu maanna Uummannami najugaqartunut tunissuteqarfigerusussimavagut.  Qanorluunniit pisariaqartitsisunut annikitsumik ikiuilaarneq pitsaasumik kinguneqartarmat uani meeqqat atuartut atuarfimmi aallartilluarnissaat pingaartillutigu atuagaasivimmik, aqerluusaasivimmik, taquaasivimmik imerfimmillu tunineqarput, oqarpoq KNI-p pisortaanera Peter Grønvold Samuelsen.

Ulla aamma Nukannguaq Samuelsenikkut akulliliaat 11-nik ukiulik Anina Samuelsen oqaluttuarpoq ullumikkut Uummannami atualerlutik aallartinnertik nuannaralugu. Atuarfimmigooq assassorneq nuannarinerpaavaa.

- KNI-p meeqqanut atualerniartunut tunissuteqarnera assut qujanarpoq. Uagut Nuugaatsiarmiuuvugut pingasunillu atuartunik qitornaqarluta. Meeqqagut atuagaasivimmik imarisaannillu tunisikkamik assut nuannaartut kiinaatigut takuneqarsinnaapput. Tamannalu qujanarpoq, meeqqattami atuagaasivii Nuugaatsiamiit nassarsinnaasimannginnatsigit, oqarpoq meeqqanut ataataasoq Nukannguaq Samuelsen.

Ilaqutariit Samuelsenikkut maanna Uummannami najugaqarallarput, inigissaartinneqarnertillu qujamasuutigalugu. Taamaattorli nunaqarfigisaminnut angerlarsiummertarnertik miserratiginngilaat, sulilu nalullugu qaqugu uteqqikkumaarnerlutik.

KNI juulip qammataani tassaarsuarmik eqqugaasunut aningaasanik atortunillu tunissuteqarpoq. KNI nammineq 250.000 koruuninik aningaasaliivoq,  saniatigullu KNI-p pisiniartarfii suleqataasalu tapiissuteqarneri ilanngullugit katillugit 500.000 koruunit sinnerlugit tapiissuteqarlutik.

 

 

Uummannaq-Skoletasker-3-630px.jpg

 

Uummannaq-Skoletasker-1-630px.jpg

 

Uummannaq-Skoletasker-2-630px.jpg

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl