KNI ileqquusumik ataatsimeersuarpoq

Pingasunngornermi 16. august 2017 KNI A/S ileqquusumik ataatsimeersuarpoq, Sisimiuni. Piginnittut sinnerlugit Naalakkersuisut siulittaasuata Naalakkersuisoqarfiani immikkoortortami pisortaq Lars Balslev najuuppoq Naalakkersuisullu siulittaasuat Kim Kielsen sinnerlugu ataatsimeersuartitsisuulluni.

Ataatsimeersuarnermi siulersuisut nalunaarutaat tusaatissatut tiguneqarpoq ukiumoortumillu naatsorsuutit 2016/17-imoortut akuerineqarlutik.

KNI-mi siulersuisut siulittaasuat Niels Thomsen nalunaaruteqarnermini ilaatigut ima oqarpoq: "Ukiumut angusat – akileraarut ilanngaatigereernagit 103,4 mio. kr. – takutippaat suliffeqarfissuaq aqulluarneqartoq aammalu aningaasaqarnikkut ingerlalluartoq, taamalu angusarisartakkaminik pitsaasunik ingelatitsiinnartoq. Niuernikkut pissutsit sakkortuneruleraluartut, ilaatigut nunaqarfiit ilaasa illoqarfiillu mikinerusut inukilliartornerat eqqarsaatigalugu, taamaattoq ukiumut siulianut sanilliullugu angusat pitsaanerulerput."

Naalakkersuisut Siulittaasuat Kim Kielsen sinnerlugu Lars Balslev-ip KNI-ip angusarissaarnera pillugu nersualaarinnippoq, sulisut, aqutsisut siulersuisullu qutsavigalugit. Ilaatigullu oqarluni: "KNI-p suliffeqarfittut piumassuseqarluartutut imminullu akilersinnaasutut aammalu pisisartunik taakkualu pisariaqartitaannik paasinnilluarsinnaasutut takorluugaqarmat Naalakkersuisut nersualaarpaat.

Kalaallit Nunaat tamakkerlugu inuit atugarissaarnerulernissaat anguniarlugu KNI sulivoq, tassungalu atatillugu kissaatigaarput Naalakkersuisut KNI A/S-illu annerusumik suleqatigiinnerisigut kusanartumik angusaqarnikkut, peqataanilu ingerlatseqatigiiffiup ineriartorfiujuarneratigut KNI tamakkununnga iluaqutaajumaartoq."

Ataatsimeersuarnermut inassutigineqartutut ataatsimeersuarnerup aalajangerpaa, piginnittunut DKK 20 mio.-it sinneqartoorutisiaritinneqassasut. Taakku saniatigut ukiumi naatsorsuuteqarfiusumi sulisut akileraarutaat 80 mio. kr.-iusut, kiisalu 24,5 mio. kr.-it selskabsskat inuiaqatigiinnut akiliutigineqarput.

KNI 1.000 missaanniittunut suliffissaqartitsivoq ukiumullu 130 mio. kr.–it naliginut sanaartornermut atortarlugit.

Siulersuisunut ilaasortat tamarmiusut ataatsimeersuarnermi qinigaaqqipput.

Deloitte, Statsautoriseret Revisionsaktieselskab, suliffeqarfissuup kukkunersiuisuisut qinerneqaqqipput.

KNI-p siulersuisuisa KNI-mi pisisartut, sulisut niuernikkullu suleqatigisat tamaasa qutsavigivaat.

Annerusumik paasisaqarniaraanni pisortaaneq Peter Grønvold Samuelsen attavigineqarsinnaavoq oqarasuaatikkut +299 55 37 03 imaluunniit e mail: pgs@kni.gl atorlugit.

____________________________________

Årsregnskabsperioden for KNI A/S er 1. april – 31. marts.