Julie Jensen KGH-mi KNI-milu katillugit ukiuni 40-innguilluni nalliuttorsiorpoq

Direktionssekretær Julie Jensen 1. august 2019 KNI-mi ukiuni 40-ni atorfeqarsimanermini nalliuttorsiorpoq. Tamannalu nammineq kissaataa naapertorlugu tallimanngornermi 23. august 2019 KNI-p Sisimiuni Kiffartuussiviata Nerisarfiani kusanartumik, ilaqutai suleqaterpassuilu najuuttoralugit malunnartinneqarpoq.

Ilasseqatigiinneq ammarlugu sulisoqarnermut pisortaq Mikol Poulsen tikilluaqqusereermat erinarsoqati-giittoqarpoq.

Pisortaaneq Peter Grønvold Samuelsen oqaaseqarpoq, ilaatigut makku oqaatigalugit:

”Julie – ukiut 40-it KGH-mi KNI-milu sulereersimalerputit. Ukiorpaalussuit, taamaakkaluartoq oqartuarputit ullaakkut makittarlutit suliffinnut nuannarisarnut ilumoorfigisarnullu suliartornissat qilanaaralugu. Suliallu oqitsut unammillernartullu, ullut qiimasuffiit nikallungaffiusullu aqqusaartarsimassavatit, ullut oqinnerit oqimaatsullu tamaasa ilanngullugit.

Suliffeqarfippummi suliffeqarfiit allat assigalugit pisoqarfiusarpoq unammillernartorpassuaqartarlunilu, kisiannili aamma nuannersorparpassuarnik misigiffigisarparput, tamannalu ilisimalluarpat ukiullu ingerlanerini tamakku aqqusaartortuagarisimavatit.” Grønvold Samuelsen aallartippoq nangillunilu:

Qaanaamiinnissi Thule Kommune-mi ilinniartunngorsimavutit Ikast Handelsskole-mi atualersimallutit, naammassigavillu Qasigiannguanut utersimavusi, tassanilu tassa KGH-mi ilinniarnerit nangissimavat, naammassigavillu 31. juli 1979-imi allaffimmiutut sulilersimavutit, taamanikkut niuertuusumut Orla Kjeldsen-imut allatsinngorsimallutit. Tamatuma kingorna Qasigiannguani niuertussanut niuertunullu allattaasarsimavutit, soorlu Ejnar Østergaard, Eigil Ohlsen aamma Gerhardt Petersen-imut, 1993-imi Maniitsumut nuunnissarsi tikillugu.

1993-imi Maniitsumut nuunnissi kingorna ulloq manna tikillugu KNI-mi pisortaanerit qulingiluat allattaaffigisimavatit, soorlu Gerhardt Petersen, Ole Møller, Keld Askær, Vagn Jensen, taavalu Lars Møller Sørensen paarlattaatsiarnerani, Søren Mortensen Claus Jensen, kiisalu ukiuni kingullerni arfinilinngulersuni uanga suleqatigisimavakkit.

Pisortanut pisortaanernullu kiffartortuunerpit saniatigut suleqatigisimasarparpassuavit ilaat qularinngilara eqqaamagitit, ingammik aamma Qasigiannguani, taavalu Qeqertarsuup tunuani ilaquttatit ilanngullugit, amerlaqisut peerutereersut.

KNI A/S-imi pisortaqatigiit suleqaterpassuatillu sinnerlugit Julie ilaquttatillu pilluaritsi. Qujanaq ukiorpassuarni suliffigisannut ilumoorlutit tunniusimallutillu kiffartortuaravit.” Pisortaaneq oqarpoq, Julie-llu ilaqutai najuttut uia Via – Frederik Jensen, ernerat Jonas aamma paniat Ane Sofie ilaqutaallu saaffigalugit qujassuteqarfigai:

“Ilissi aamma pilluaritsi, qujassuteqarfigerusuppassilu nuliat – anaanarsi suliffimminut tunniusimalluinnarluni ukiorpassuarni sulinerani tapersersortuarsimagassiuk, qularnanngilaq piffissarujussuaq aamma angalanernut atortarmagu angerlarsimaffissinniit qimaqqasarsimassagaasi, suliaminummi tunniusimaqaaq, tapersersortuarassiullu KNI-miit assut qujaffigaatsigit.”

“Naggasiutigalugu una oqaatigerusuppara:

Una oqaatigerusuppara. Ataqqinaatigivat atorfimmi tassani, kikkuugaluartut kiffartorfigisimasatit, ajortumik eqqartorneq ajorakkit. Tamanna malunginiarnarpoq ilinni, tamannalu inuttut qanoq ittuunernik oqaluttuarpoq.

Ataaseq kisiat nuannaralugu eqqaasarpat, tassalu Qasigiannguani niuertuusimasoq Orla Kjeldsen. Qasigiannguani niuertup illorsuatoqarsuani KGH allaffeqarallarmat arlaannik piumaffiginiarlutit nueqquleraagamitit suaartarsimammatit: Juuuuliaaaaaa.

Tamassi pilluaritsi.” Pisortaaneq Peter Grønvold Samuelsen oqarpoq.

Pisortaaneq oqaaseqareermat kaffisoqatigiittoqarpoq Kiffartuussivimmi sulisorpassuit Julie-llu ilaqutai najuuttoralugit.

Ullorsiortoq nammineq aamma oqaaseqarpoq, ukiut 40-it ingerlanerini pisimasorpassuit suleqatigisimasanilu eqqaallugit, suliffik nuannarisani pissanganartoqartuaannartoq eqqartorpaa, ilaquttanilu tapersersortigisani qutsavigalugit.