Periusissiorluarnerup sulisullu pikkorissut kingumut KNI angusarissaarteqqippaat

Ukioq naatsorsuuteqarfiusoq 2017/18 ukiuuvoq KNI-mut ineriartorfioqqittoq angusarissaarfiusorlu, suliffeqarfissuup periusissiaminik siunniussaqarluni anguniagaqarneranut naapertuuttumik.

KNI A/S akileraarutit suli ilanngaatigineqannginneranni DKK 103 mio.-nik sinneqartoronermigut siornatut amerlatigeqqissaartunik sinneqartoorpoq.

Ukiumoortumik angusaq
Ukioq naatsorsuuteqarfiusoq kingumut KNI-mut aningaasaqarnikkut patajaallisaanermut atorneqaqqippoq, suliffigissaanermut, pisisartunillu qitiutitsinissamik ”kalaallit inuunerannik ilorlermik” pingaartitsillunilu ataqqinninnermik tunngaveqartumik suliffeqarfimmik ingerlatsinisssamik pingaartitsiffiulluni.

Periusissiaq Killingusaaq 2017-miit aallartinneqartoq 2020-ilu ilanngullugu ukkanneqartussaq piviusunngortiterlugu ingerlanneqarpoq.

Nioqqutissanik pilersuineq DKK 66 mio.-nik sinneqartoorfiuvoq, ukiup siuliani sinneqartoorutit DKK 38 mio.-niusimallutik. Angusarissaarnerunermut ilaatigut pissutaapput kaaviiaartitaqarneruneq, aningaasartuutikillisaaneq aningaasartuutinillu aqutsilluarneq, kiisalu nioqqutissanik pingaarutilinnik akikilliliisimaneq.

Ikummatissanik pilersuinermi ingerlatsivik Polaroil DKK 54 mio.-nik sinneqartoorfiuvoq, ukiup siuliani DKK 65 mio.-nik sinneqartoorfiusimalluni. Ukiumi naatsorsuuteqarfiusumi ikummatissap akia liiterimut katillugu 65 øre-mik appartinneqarsimavoq.

Ukiumoortumik sinneqartoorutit sunnerneqarput Pitsaasut ApS pillugu suleqatigisap ukioq akiliisinnaajunnaarneratigut DKK 20 mio.-nit annaasaqaataasimanerannit.

Akileraarut ilanngaatigereerlugu angusat DKK 70 mio.-iupput. Nammineq aningaasaatit (egenkapital) DKK 1.216 mio.-niupput. Taamaalilluni naqissuserneqarpoq KNI suliffeqarfissuusoq aningaasatigut patajaatsumik inissisimasoq.

Sanaartukkat
Suliffeqarfissuup aningaasarsissaarnissaa pingaaruteqarluinnarpoq sanaartukkat pisoqalisut aserfallatsaaliortuarneqarnissaannut akissaqassagaanni; tamannalu Pilersuisoq Polaroil-iluunniit eqqarsaatigalugit atuuppoq.

Nioqqutissanik pilersuinerup iluani sanaartukkat aserfallatsaaliorneqarnissaannut kinguaattooru-tit DKK 300 mio.- it missaanniipput, Polaroil-imilu aserfallatsaaliuinissamut kinguaattoorutit DKK 170 mio.-it missaanniillutik. Aningaasalersugassat taama annertutigisut isumagineqassappata pi-sariaqarluinnarpoq KNI-p sinneqartooruteqarluni ingerlanneqarnissaa, aningaasaateqanngikkaannimi sanaartortoqarsinnaanngimmat.

Aserfallatsaaliuineq kisiat aningaasalersorneqartussaanngilaq, aammattaarli nutaaliorneq akissaqartinneqartariaqarluni. Ukiumi qaangiuttumi DKK 111 mio.-it sanaartornermut atorneqarsimapput. Ukiuni aggersuni ukiumut DKK 150 mio.-it sanaartornermut atorneqarnissaat naatsorsuutigineqarpoq.

Piginnittut sinneqartoorutisiaat akileraarutillu
KNI-p piginnittui – Namminersorlutik Oqartussat – isumaqatigiissuteqarfigalugit sinneqartoorutit ilaat DKK 20 mio.-it piginnittunut sinneqartooruteqarnersiutisiassatut immikkoortinneqarput.

Ukiumi naatsorsuuteqarfiusumi 2017/18-mi KNI-mi sulisut akileraarutaat DKK 75 mio.-it pisortat karsiinut utertippaat, kiisalu selskabsskat DKK 25 mio.-it akilerlugit.

Taqqissuut – KNI-mi sulisunik piginnaanngorsaaneq
KNI ukiumi naatsorsuuteqarfiusumi 2017/18-p naanerani 934-nik sulisoqarpoq. Ulloq naallugu suliffinngortissagaanni 760-it KNI-mi sulisorneqarlutik. Taamaalilluni KNI Kalaallit Nunaanni suliassaqartitsinerpaat akornanniippoq.

Kingumut sulisut piginnaanngorsarneqarneri Taqqissuut aqqutigalugu annertoorujussuarmik ingerlanneqarsimavoq. Sulisunik siuttunillu piginnaanngorsaaneq KNI-mit assorsuaq pingaartinneqarpoq isumagineqarlunilu.

KNI-p namminerisaminik Niuertunngorniarnermik ilinniartitaanera ingerlallualereerpoq. Nutaatut Ikummatissaasivilerisunngorniarneq pilersinneqarpoq.

KNI A/S 62-nik ilinniartoqarpoq, tamannalu ukiup siulianut sanilliullugu 20 %-mik siuariarneruvoq. Ilinniartut naammassisartut ilarpassui KNI A/S-imi suliffeqaannartarput.

Sulisunut, pisisartunut suleqatinullu qujanaq
Siulersuisut ulluinnarnilu aqutsisut suliffeqarfissuup sulisui pikkorissut piumassuseqarluartullu tamakkerlugit qutsavigaat angusarissaarnermut, taamatuttaarlu suliffeqarfiit suleqatigisat, minnerunngitsumillu pisiniartartuvut qujanarsuaq.

Annerusumik paasisaqarusukkaanni pisortaaneq Peter Grønvold Samuelsen attavigineqarsinnaavoq, mobil +299 55 37 03.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl