KNI-p inuiaqatigiinni siunertanut suliniutinullu pitsaasunut aningaasaliisarnera

KNI A/S ukiut ingerlanerini - suliffeqarfittulli allatut - kultoorikkut, timersornikkut, inuiaqatiginnilu siunertanut suliniutinullu pitsaasunut allanut, soorlu nappaassuarmut akiuiniarnermut, meeqqat inuusuttuaqqallu sernersorneqarnissaannut tapersersorneqarnissaannullu aningaasaliissuteqartarpoq.

Ukiut kingullerpaat eqqarsaatigalugit aamma ikiuiniartoqartillugu tamatumunngalu atatillugu aningaasanik katersuiniartoqartillugu, KNI A/S annertoorujussuarmik peqataasarpoq. Tamanna ikiorniarneqartunut qujanartarpoq, tamanna malugisarparput, qujanartumillu KNI A/S-imi sulisorpassuit immikkut akissarsisinneqarnissaq pinngikkaluarlugu, amerlasuutigut sunngiffitsik atorlugu allaat suleqataasarput.

Malunginiartarparpulli suliniutit ilaannut KNI A/S-ip aningaasaleeqataasarnera inuit ilaannit apeqquserniarneqartartoq. Akerliliiniartut ilaasa tunngaviginiartarlugu, tassagooq suliniut taanna sumiiffinni Pilersuisup pisiniarfeqarfiginngisaaniimmat.

Tamatumunnga atatillugu erseqqissarusupparput KNI A/S - suliffeqarfittulli allatut - inuiaqatigiinnit pigineqarnera puigornagu - kiffaanngissuseqarmat suliniutit pitsaasutut nalilikkani - suliffeqarfittullu imminut iluaqutigisinnaasorisani isumaqatigiissuteqarnikkut (sponsorat) aningaasaliiffigisinnaammagit.

KNI A/S suliffeqarfiuvoq Kalaallit Nunaat tamakkivillugu suliffeqarfissuusoq - aamma illoqarfinni tallimani anginerni Pilersuisumik pisiniarfeqarfiunngikkaluartuni allaat. Tassami KNI A/S aamma tassaavoq Polaroil, KNI Engros, Neqi A/S, Pisisa aamma Duty Free.

KNI A/S ukiumut 2,5 mia. kr.-nik kaaviiaartitsisarpoq. Kaaviiaartinneqartut taakku amerlanerpaarpaartaat Nunatsinni sumiiffinni Pilersuisumik pisiniarfeqarfiunngitsuni isertitaapput. Taamaattumik KNI A/S-ip suliniutinut aningaasaliissutaasa sumiiffinnut tutsinneqartannginnissaannik Pilersuisumik pisiniarfeqannginneraalluni tunngavilersuineq imaassinnaavoq paatsoornermik tamakkiisumilluunniit pissutsit qanoq ittuunerinik paasinnissimannginnermit pissuteqarsimasinnaapput.

KNI A/S nammineq atini atorlugu, ilaanni Pilersuisoq Polaroil-iluunniit atorlugu suliniutinut aningaasaliissuteqartarpoq. Nunaqarfippassuarni meeqqat suliniarfigineqarneri, peqatigiiffiit aningaasannanniarlutik katersuiniarnerinut aaqqissuussisarnerinullu Pilersuisoq ukiut tamaasa pilliuteqartarpoq.

Avannaata Qimussersua, siulitta timersuutaannik unammiuaartitsisarnerit, ACR, timersoqatigiiffiit arlallit, KNI-imi sulisut qitornaasa efterskoleriarnissaannut, nunanulluunniit allanut allamiut oqaasiinik pikkorissariarnissaannut KNI-mit aningaasaliiffigisarpagut.

Nappaassuaq kræfti akiorniarlugu Neriuffiit katersuiniaraangata, Røde Kors katersuiniaraagat, Nakuusa katersuiniaraagat KNI A/S tunuarsimaarneq ajorpoq. Nuugaatsiarmiut Illorsuarmiullu tassaarsuarmit eqqugaammata ikiuiniaqataanermi peqataasimavugut.

Taamatut periarfissaqartarnerput nuannaarutigaarput tulluusimaarutigalugulu. Nuannaarutigaarput suliffeqarfipput KNI A/S taamaaliorsinnaanerminut periarfissaqarsinnaammat.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl