KNI A/S kajumissaammik tunniussivoq

Najaaraq Olsen Ilisimatusarfimmi aasaanerani soraarummeerluni naammassinermi KNI-miit akissarsitinneqarpoq.

KNI A/S ukiut tamaasa Ilisimatusarfimmi bachelorinngortut akornanni 5.000 koruunimik tunniussisarpoq. Tallimanngornermi 24. juni 2022 aamma taamaaliortoqarpoq.

KNI-p kajumissaasiuttagaa KNI A/S sinnerlugu KNI Engrosimi pisortamit Johannes Grothimit bachelorinngortumut Najaaraq Olsenimut tunniunneqarpoq.

Johannes Groth tunniussinermini ilaatigut KNI sinnerlugu ima oqaaseqarpoq: ” Ukiut tamaasa KNI-mit maaniittarpugut ilinniarnissinni naammassisusi persuarsioqatigiartorlusi. KNI-mit sukataarlutik angusarissaarusullutik ilinniarsimasut tapersersorusuttarpagut.

Kalaallit Nunatsinni assut atorfissaqartippassi. Ilinniarsimaneq Kalaallit Nunaannut nukiuvoq, aammalu sakkussaalluarluni.Taamaattumik ullumikkut naammassisusi neriuppunga Kalaallit Nunaanni sineriammi angalajumaartusi, Kalaallit Nunarput siuarsarlugu kivitseqataajumaartusi.

KNI A/S sinnerlugu maaniippunga Ilinniarfissuarmi bachelorinngortuni karakterisigut angusarissaarsimanerpaaq Najaaraq Olsen Olsen kajumissaaserniarlugu.

Angusannut kusanangaartumut pilluaqqungaarpatsigit, siunissamillu qaamasumik kissaappatsigit. Najaaraq pilluarit”.

KNI-mit ilinniakkaminnik naammassinnittoq Najaaraq Olsen pilluaqqungaarparput.