KNI-mi suleqat misilittagartooq nersornaaserneqartoq

Nersornaaserneqartup Otto Sanimuinap meeraalluni akissarsiatut siullertut eqqaamasaa tassa appelsiina.

Otto Sanimuinaq tallimanik ukioqarluni Isortumi KGH-mi nammineq kajumissutsiminik  ikiuutilaartalerpoq. Aatsaalli 1975-imi 15-inik ukioqarluni pisortatigoortumik KGH-mi sulilerluni.

Decembarip 8-ni 2017, ataqqinartorsuup Dronningip nersornaasiuttagaanik fortjenstmedaljemik sølviusumik suleqat tatigineqartoq misilittagartoorlu ukiuni 40-ni sulisimanerani, Otto Sanimuinaq Tasiilameersoq saqqarmiulerneqarpoq.

Ullut suliffissat tamaasa suliffigai
Otto Sanimuinaq 2015-mi KGH-mi/KNI-mi ukiuni 40-nngortorsiornini nalliussivaa. Saqqarmiulerneqarporli 8. december 2017 Tasiilami Pilersuisumi nalliuttorsiutigineqarluni, ulluinnarni quersuarmi suliffigisaani.

Tasiilami tuniniaanermi pisortaq Martha Mikaelsenip KGH/KNI-mi ukiorpassuarni sulisuusimasup Otto Sanimuinap nalliuttorsiutigineqarnerani ataqqinartorsuup Dronning Margrethe-p aappaata nersornaasiuttagaanik Fortjenstmedalje sølviusumik saqqarmiulerpaa. Saqqarmiulernerani tikkuarpaa taamak saqqarmiuliisarneq qaqutigoortuusoq.

- Otto,inuttut ilisarnaatigaat suliffinnut tunniusimasuunerit ataqqinnittuunerillu, ullut suliffissaasut tamaasa suliartorfigisarpatit, taamaalillutit suliassanik assigiinngitsunik misilittagaqartuullutit. Sulininni pingaartitavit ilagaat suliffinni eqqiluisaarneq, nalliuttorsiornermi Martha Mikaelsen Otto Sanimuinarmut oqalugiarnermini ilaatigut taama oqarpoq.

Piniartussamiit atorfilimmut
Otto Sanimuinaq tunumi Isortumeersuuvoq, Tasiilamilu meeqqat atuarfiani atuarnini nangikkiartoreerlugu nunaqarfimminut uterami piniartussatut ilinniarsimavoq. Umiarsuaq Isortumut tikikkaangat ikiuuttareermat, taamani niuertuusup Ole Sivertsenip Otto aperisimavaa KGH-mi suliler-sinnaanersoq.  Taamani 1975-mi sulilerami 15-inik ukioqarpoq.

Kingorna Tasiilamut nuuppoq KGH-milu sulilerluni. Assigiinngitsorpassuarni sulilluni misilittagaqarfigaa, ilaatigut Narsarsuarmi sulisimalluni, atisaarniarfimmi ikiortaasimalluni, pisiniarfimmilu sulisarsimalluni allarpassuarnilu.

Taamanikkut piffissaq allarluinnaasoq Ottop eqqaamavaa. Regnemaskiinat kasset innaallagiaqanngillat, qulliit petroliutortuinnaapput EDB-eqaranilu.

Otto Sanimuinaq ilaqutaalu KNI A/S-imiit pilluaqqorujussuarpagut. 

Annertunerusumik paasissutissat

Peter Grønvold Samuelsen
Adm. Dir.
pgs@kni.gl
+299 862301

Otto Sanimuinaq 630.jpg

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl