KNI ilusilersuisarnermi nersornaammik nuimasumik Red Dot-imik nersornaaserneqarpoq

Sisimiut, 11. august 2020. Red Dot Award tassaavoq nunarsuatsinni ilusilersuisarnerup iluani nuimanerpaamik nersornaasiunneqartartut ilaat. Qanittumi ukioq manna nersornaasiisoqarnerani KNI-p Pilersuisumik nutaamik nittarsaassinera Red Dot-imik nersornaaserneqarpoq. Nersornaasiinissamut unammisitsinermi peqataasut 7.000-it nunanit 50-ineersut nassiussissimasut unammillertigalugit nersornaaserneqarneq pivoq. Siusinnerusukkut nersornaaserneqartarsimasut tassaapput Sony, Audi, Coca-Cola aamma Google.

KNI-mi pisortaaneq, Peter Grønvold Samuelsen, nersornaaserneqarnerminnut tulluusimaarutiginnippoq nuannaarlunilu: "Nersornaasiisarnermi aalajangiisartut nutaamik isikkulersuisimanitsinnik akissarsititsinerat tulluusimaarutissaraarput. Nunarsuatsinni isikkulersuisartut pikkorinnerpaat unammillertigisimavavut, taamaattumik nersornaasiinerup Nunatsinnut tunniunneqarnera assorsuaq ajasoornarpoq" oqaluttuarpoq nangillunilu:

“Nuannaarutiginerpaavaralu kinaassutsitsinnik allat aamma nersorinnissinnaanerat. Taamatut isikkulersuinitsinni Pilersuisup suli kalaalerpaluttunngortinnerunissaa sumiiffiillu tunngavigalugit isikkulersuinissarput anguniarsimavarput. Taamaattumik pisiniarfitsinni allagartaliussuuttakkavut kulturitsinnut nunallu immikkoortuini sumiiffinnut naleqqussartarpavut taamaalillutillu pisiniarfitta assigiissaartumik isikkulersorneqarnerinik takutitsisarlutik.

Pilersuisoq nunaqarfinni tamani ippoq
”Nunatsinni oqaluttuarisaanerput KNI-mi tulluusimaarutigaarput, taamaattumillu tamatta ilisarnaatitut atortakkatta tunngaviginissaat uagutsinnut pissusissamisuuginnarpoq, soorlu nuilaqutit nipinngasortaat erfalasorpullu tunngavigalutigit isikkulersuisimalluta - aammali sumiiffinni atorneqartartut isikkulersuutigisarpavut soorlu ulut, piniakkat, qamutit qimussillu. Tassami Pilersuisup pilersuisussaatitaanera tunngavigalugu Nunatsinni tamani ikkatta sumiiffinni atuuffeqartuassaagut - tamannalu isikkulersuisimanitsinni takuneqarsinnaavoq," Peter Grønvold Samuelsen naggasiivoq.

Nutaatut isikkulersuutivut maani takusinnaavatit
2019-imi Pilersuisoq pisiniarfinni nutarterilluni aallartippoq taamaalillunilu kinaassutsitsinnik attuumassuteqarfiginninnitsinnillu ersarinnerulersitsilluni. Nutarterineq suli ingerlanneqarpoq, nutaamillu isikkulersuilluta nutarsariikkavut ilaatigut Tasiilami,  Aasianni, Uummannami Qaanaamilu takuneqarsinnaapput.

kni-nersornaaserneqartoq-630px.jpg
Isikkulersuisarnermi nunarsuatsinni nuimanerpaamik nersornaasiunneqartartut ilaannik KNI-p nersornaaserneqaataannut assersuutit

 

RED DOT pillugu:
Nioqqutissianik isikkulersuisarnerup, attaveqaqatigiinnermi isikkulersuisarnerup qanorlu isikkulersueriaaseqartarnerup iluani pitsaanerpaamik isikkulersuisimasut akornanni Red Dot Institute-mi Berlinimiittumi sulianut immikkut ilisimasallit ukiumoortumik toqqartuisarput. Ukioq manna siunnersuutit nunarsuatsinniit tamaneersut 7.000-it Red Dot-imut nassiunneqarsimapput. Ajugaasut suliarisimasaat, ilaatigut KNI Pilersuisup pisiniarfinni isikkulersuisimanera, atuakkami ukiumoortumik saqqummertartumi oktoberimi saqqummersussami saqqummiunneqassapput.   

Pasissutissanik amerlanerusunik perusukkaanni saaffissaq:
Anders Stenbakken
atb@kni.gl
+299 55 15 77 /  +45 21 35 15 77

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl