KNI pisortaanissamik atorfinitsitsivoq

 KNI A/S-imi siulersuisut Jeppe Jensen KNI-mi pisortaanissatut atorfinitsippaat. Jeppe Jensen-ip Peter Grønvold Samuelsen paarlassavaa, taanna aprilimi atorfimminiit tunuarniuteqarluni suliunnaarpoq.

Jeppe Jensen Mittarfeqarfinni aqutsisoqarfimmi pisortaavoq kiisalu Mittarfeqarfinni aamma Tele Greenlandimi unammillernerup iluani aqutsisutullu misilittagaqarluartuuvoq.

KNI-mi pisortaaninngortussaq Ilulissani inunngorpoq peroriartorlunilu kingusinnerusukkullu Nuummut nuussimalluni, ullumikkullu ilaquttanilu Nuummi najugaqarlutik. Jeppe Jensen Aarhusimi Handelshøjskolemi cand.merc.-itut nunarsuaq tamakkerlugu niuernerup iluani ilinniagaqarpoq.

“KNI-p siulersuisuniit assut iluarisimaarparput inuk eqqortoq KNI-mut naleqqulluinnartoq siunissamilu KNI-p qanoq ineriartortinneqarnissaanut suliaqarsinnaasoq atorfinitsissinnaanngoratsigu”, siulersuisut siulittaasuat Lars Borris Pedersen oqarpoq nangillunilu: “Jeppe Nunatsinneersuuvoq aqutsisutut pikkorilluinnartoq, Nunatsinni attaveqarfigilluartakkaminik peqarluarpoq kiisalu pingaarneq tassaalluni Jeppe Nunatsinni inuiaqatigiit pitsaasumik sunniuteqarluarfigerusuttuummagit. Tamannarpiarlu KNI-p ataneranut tunngaviulluinnartuuvoq", Lars Borris Pedersen naggasiivoq.

Jeppe Jensen pisortaaninngornissaminut tunngatillugu ima oqarpoq:

“KNI-mi pisortaaninngornissannut tatigineqarnera assut maniguuffigaara. Nunatsinni attaveqaatitigut atortulersuutitigullu KNI ilaalluinnartuuvoq - suliffeqarfiuvoq Nunatsinnik ataqatigiissitsisuusoq tamattalu arlaatigut attuumassuteqarfigisarput. KNI-mi sulisut pikkorissut peqatigalugit suliffeqarfiup Nunatsinni inuiaqatigiinnut iluaqutaasussamik ineriartortitsinissannut qilanaarpunga."

Jeppe Jensen ulloq 5. august 2021 pisortaaninngussaaq.

 1.png

 

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl