Siunnerfilimmik periusissiorluni sulineq sulisullu suliffimminnut naammagisimaarinnittut pissutaallutik KNI ukiup affaani siullermi angusarissaarpoq

Piffissaq nalunaarusiorfiusoq: 1. april – 30. september 2018.

Piffissaq naatsorsuuteqarfiusoq

KNI 2018/19-mi naatsorsuuteqarfigisamini ukiup affaani siullermi akileraarut suli ilanngaatiginagu DKK 72,8 mio.-nik sinneqartooruteqarpoq, ukiup siuliani ukiup affanut DKK 60 mio.-nik sinneqartoorsimalluni.

2018/19-mi naatsorsuuteqarfiusumi ukiup affaanut angusat tunngavigalugit naatsorsuutigineqarpoq KNI-p ukioq tamakkerlugu naatsorsuutai DKK 110-116 mio.-it akornanni sinneqartoorfiujumaartut, akileraarut suli ilanngaatiginagu.

Ukiup affaani siullermi ukiup siulianut sanilliullugu DKK 12,8 mio.-nik sinneqartooruteqarneruneq makkunannga pissuteqarpoq:

  • Nioqqutissanik pilersuinermi DKK 3 mio.-nik sinneqartoorneruneq
  • Ikummatissanik pilersuinermi DKK 10,9 mio.-nik sinneqartoorneruneq
  • KNI-p ataani ingerlataqarfiit DKK 0,9 mio.-nik sinneqartooruteqarnerunerat
  • KNI-p ingerlatseqataaffigisaani DKK 2 mio.-nik amingartooruteqarneq

Ukiup affaani naatsorsuuteqarfiup ingerlanerani nioqqutissanik pilersuinermi kiffartuussinissamut Namminersorlutik Oqartussat tapiissutaat DKK 18 mio.-iusut affaannanngortillugit DKK 9 mio.-inngortinneqarput. Tamatumunnga tunulequtaavoq 1. januar 2018 atuutilersumik innaallagissamut akit appartinneqarnerisigut KNI-p sipaarutigisai landskarsimut utertinneqarmata.

2018-ip ingerlanerani marloriarluni Pilersuisup niuertarfiini nioqqutissat ulluinnarni inuuniarnermi pisariaqartinneqartut arlalippassuit akikillineqarput, tassa februarimi aamma oktoberimi.

Ukiup affaani angusat suliffeqarfissuup siunnerfilimmik pilersaarusiorluni anguniagaanut aningaasatigut patajaatsumik tunngavissaqalersitsipput, suliffeqarfissuullu suli ineriartoqqissinnaaneranut angusarissaarnerunissaanullu upperinnilersitsillutik.

Angusarissaarneq aamma minnerunngitsumik pissuteqarpoq sulisunik ukkassineq piginnaanngorsaanerlu oqaasiinnaanngitsutigut annertuumik ingerlanneqarmat, suleriaatsit periutsillu nutarterneqartuarlutik.

Ukiumi naatsorsuuteqarfiusup 2018/19 affaani siullermi kaaviiaartitta DKK 1.315 mio.-iupput, ukiup siulianut sanilliullugit DKK 65 mio.-nik amerleriarlutik.

Nioqqutissanik pilersuinermi DKK 729 mio.-it kaaviiaartinneqarput, ukiup siulianut sanilliullugit 4 %-mik amerleriarlutik. Ikummatissamik pilersuinermi DKK 579 mio.-it kaaviaartinneqarput, ukiup siulianut sanilliullugit 7 %-mik amerleriarlutik.

Sanaartornermut aningaasaliissutit

Suliffeqarfissuup taamatut sinneqartooruteqarfiusumik ingerlanneqarnissaa pisariaqarluinnarpoq sanaartukkatigut nutarterinerit aserfallatsaaliuinissamilu kinguaattoorutaasimasut angummaffigineqarlutik akissaqartinneqassappata.

Ikummatissanik pilersuinermi sanaartugassatigut aserfallatsaaliugassat kinguaattoorutaasut DKK 275 mio.-nik naleqarput, ikummatissaasivissuillu aserfallatsaaliorneqarnissaannut kinguaattoorutit DKK 160 mio.-nik naleqarput. Tamakku isumagineqassappata suliffeqarfissuup sinneqartooruteqarneratigut taamaallaat akilerneqarsinnaapput.

Naatsorsuutit pillugit paasisaqarnerorusukkuit pisortaaneq Peter Grønvold Samuelsen attavigisinnaavat pgs@kani.gl-imut imlt. Mobil nr. +299 55 37 03-imut.

 

____________________________________ 

Maluginiagassaq: KNI A/S ukiumoortumik naatsorsuusiortarpoq 1. april – 31. marts.

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl