Niels Thomsen KNI A/S-ip siulittaasuatut tunuarpoq

Ajuusaarutigalugu siulersuisut ulluinnarnilu aqutsisut ullumikkut Niels Thomsen-imit nalunaarfigineqarput KNI A/S-ip siulittaasuatut ingerlaannartumik atuutilersumik tunuartumit.

Niels Thomsen-ip tunuarnerminut nammineq pissutaatippaa "siunissami sulinissannut piffissamillu pingaarnersiuinermik".

Niels Thomsen august 2013 taamanikkut Naalakkersuisuusunit KNI A/S-ip siulittaasuatut ikkunneqarpoq. Taamaalilluni Niels ukiuni kingullerni sisamat affarlu suliffeqarfissuarmut siulittaasutut sulisimavoq. Piffissap aallaqqaataani suliffeqarfiup iluani paatsiveerunnertut oqaatigisariaqarnerusoq iserfigisimavaa, ullumikkulli suliffeqarfik sutigut tamatigut nukittoriarsimavoq, aqutsisoqarnerup aningaasaqarnerullu tungaatigut.

Siulittaasup tullia Høgni Hansen siuttuugallassaaq sapaatip akunnerata tulliani siulersuisut pilersaarutaareersutut ataatsimiinnerminni inissitsiteqqinnissaasa tungaanut.

"Ajuusaarutigaarput maanna KNI-p siulersuisuini siulittaasoq pikkorissoq piginnaasaqarluartorlu annaasussanngoratsigu" siulittaasup tullia Høgni Hansen siulersuisut sinnerlugit oqarpoq, nangillunilu: "Niels pisooqataalluinnarpoq KNI A/S-ip sorpassuartigut maannna nukittunerulersimaneranut. Tunngavik patajaatsoq Niels-ip siuttuunerani pilersissimavarput, suliffeqarfissuullu aningaasaqarnera siunissamut unammilligassaqarnermut naleqqussarsimallutigu."

Inussiarnersumik

Høgni Hansen
Siulittaasup tullia

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl