Niuertunngorniat siulliit naammassipput

Siorna august 2016-imi KNI A/S-ip ilinniartitaaneq nutaaq Niuertunngorniarneq aallartimmagu Pilersuisumi sulisut 12-it aallartipput.

Taakku ippassaq soraarummeeramik tamarmik angusipput, ullumikkullu ataasinngornermi 27. februar 2017 Niuertunngorniarsimanerminnut allagartartaartinneqarput, Sisimiuni KNI-p kiffartuussiviani.

KNI-p Niuertunngorniarnermik ilinniartitsisarnera qaammatinik qulingiluanik sivisussuseqarpoq, peqataasullu piffissap taassuma ingerlanerani pingasoriarlutik Sisimiunut KNI-p kiffartuussiveqarfianut atuagarsoriartortinneqartarput. Najukkaminni sulinermi nalaanni piffissap ingerlanerani aamma attaveqaatit atorlugit suliakkersorneqartarput Niuertunngorniarnermut ilagitillugu.

Peqataasut ukiuni arlalinni nunaqarfimmi illoqarfimmiluunniit pisiniarfimmi sulinermik misilittagaqareersuupput, amerlanerillu ukiuni arlalinni Niuertutut sulereersimasuullutik. Niuertarfinnik ingerlatsineq taamaattumik taakkununnga nutaajunngilaq. Niuertunngorniarnermili peqataanermikkut annertuumik atuagarsornikkut aqutsineq, pilersaarusiorneq, niuertutut tamakkiisumik eqqarsarsinnaaneq, nalilersuisinnaaneq angusaqarusunnerlu itisilerlugit sammisimavaat.

Peter Grønvold Samuelsen, CEO, KNI A/S:

-   KNI A/S-imi periusissiornikkut ukiuni makkunani aggersunilu unammilligassatsinnut sillimmartaarnitsinnut atatillugu pisortanik sulisunillu piginnaanngorsaaneq Taqqissuut aqqutigalugu annertuumik ingerlapparput.

-   Tamatumanilu ilaalluinnarpoq Niuertunngorniarneq siorna aallartitarput. Sulisugut pikkorissut 12-it maanna Niuertunngorniarneq peqataaffigisimasartik tamarmik angusiffigalugu naammassivaat, tamannalu peqataasunut tulluusimaarnartuuvoq, KNI-mullu usorsisimaarnartuulluni. Piginnaanngorsarnitsinni pingaartut ilagaat pisisartunik kiffartuussinitta pitsanngorsartuarnissaa.

Niuertunngorniarneq pillugu annertunerusumik uani paasisaqarsinnaavutit: goo.gl/K50zgW