Nuugaatsiamut nioqqutissanik ikummatissamillu pilersuineq

Sapaatip ullaassaani nal. 01:50 KNI paasitinneqarpoq Nuugaatsiaq Illorsuillu tassaarsuarmik eqqorneqarsimasut.

Paasissutissinneqaannarluni KNI upalungaarsimaniarneq pillugu Sisimiuni KNI-p kiffartuussiviani pingaartunik pilersitsisoqarpoq, ilaatigut tassaarsuaqarnera sutigut eqquisimanersoq paasiumallugu. Avannaani niuertut attaveqarfigiortorneqarput ajunnginnersut paasiniarlugu, aammalu najugaanni tassaarsuaqarsimanersoq paasiumallugu.

Nuugaatsiaq eqqorneqarnerpaasimasoq paasinarsivoq.

Ullaassaq KNI-p angallatai Targa-t Sisimiuniit Uummannamut ingerlatinneqarput, Pilersuisumi tuniniaanermut pisortat marluk sanaartornermullu pisortaq ilaasoralugit, aseruatitersimanerit nioqqutissanik ikummatissamillu pilersuineq periarfissaq siulleq pilerseqqinnissaa isumagiartorlugu.

Umiarsuaq uuliamik usisartoq Oratank aamma Uummannap eqqaanukartinneqarpoq, ikummatissaasivinnik seerisoqalersimassagaluarpat peqqumaasiviit imaarneqarnissaat siunertaralugu, kisiannilu aamma ikummatissamik amingaateqartoqaleriataarnissaanut upalungaarsimaniutitut.

Nuugaatsiami niuertup KNI-mut ilisimatitsissutigisinnaasimavaa:

  • Nioqqutissanut qerisunut qerititsivipput aserorsimavoq, iigai matualu aserorsimallutik, qerititsivillu imarmik immerneqarsimalluni.
  • Pisiniarfik napagaluarpoq, kisianni aseruatitersimavoq tassaarsuarmillu immamik immerneqarsimalluni, igalaavilu aseruatitersimallutik.
  • Ikummatissaasivik ajorunanngilaq, ersittumillu ikummatissamik seerisoqarpasinngilaq.
  • Niuertup illua tassaarfigitissimavoq, igalaat aseruatitersimallutik imarmillu immerneqarsimalluni.

Niuertup ungasianiit isiminit takusai taamaapput, Uummannamut qimarnunneqanngitsiarnermini takusimasamisut oqaluttuai najoqqutaralugit.

Uummannami qatserisartunit paasitinneqarpugut nunaqarfimmi ikummatissaasivimmiit ersittumik ikummatissamik seerisoqanngitsoq.

Ikummatissaasiviup innaallagissamut aqqutai ajoqusersimassagaluarpata ikummatissamik tunisineq innaallagiaq atunngikkaluarlugu pisinnaavoq. Umiarsuaq Oratank 20. juni nunaqarfimmut apuutissaaq Uummannami Ikummatissaasivimmi sulisunik ilaasoqarluni. Taamaalilluni nunaqarfimmi ikummatissamik pilersuineq aallarteqqinneqarsinnaalissaaq, tamannali pisortat aalajangiinerat tunngavigalugu piumaarpoq.

Pisortat oqartussaasut assigiinngitsut ingerlaavartumik attaveqarfigivagut, taakkunanngaaniillu in-nersuussutaasut naapertorlugit iliuuserisassagut iliuuseriumaarlugit. Nuugaatsiaq tikinneqarsinnaasutut oqaatigineqarpat piaartumik pisiniarfiup quillu peqqumaatillu qanoq aseruatiterneqarsimatigineri takusariaqarpagut, nioqqutissanillu ikummatissamillu pilersuineq piaartumik pilerseqqillugu. (Nuugaatsiap eqqaa suli sikuusimavoq tikikkuminaassinnaallunilu suli).

Nunaqarfik tikittariaqarparput pisiniarfik, ikummatissaasivik peqqumaasiviillu aseruatitersimaneri takullugit nalilersorlugillu. Utaqqiisaagallartumik niuertarfimmik pilersitsingasuarnissaq pisariaqassaaq nunaqarfimmi innuttaasut maanna Uummannamukaanneqarsimasut nunaqarfimminnut utersinnaaleriarpata.

Tusarparput aamma innaallagissiorfik aserorsimasoq, nunaqarfimmilu sarfaqanngitsoq.

Nioqqutissanik illoqarfinniit nunaqarfinniillu qanittuniittunik assartuisoqarsinnaanera Royal Arctic Line-mut saaffginnissutigisimavarput, ilaatigut pisariaqassappat umiarsuit ingerlaneri allanngortinneqarsinnaaneri nunaqarfimmilu inuussutissanik pilersuisoqaqqissinnaalerasuarnissaa qularnaarneqaqqullugu.

Maannakkuugallartoq suli paasissutissiissutigineqanngilaq nunaqarfik qaqugu innoqqissinnaanersoq, pisortalli nunaqarfik ammaateqqeriarpassuk pinasuartumik qanoq iliuuseqarnissarput piareersarparput.

Inussiarnersumik

Peter Grønvold Samuelsen

Pisortaaneq

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl