Polaroil-imi pisortaq nutaaq

KNI A/S-ip Githa Brask Olsen (53) Polaroil-imi pisortatut atorfinitsippaa.

Githa Brask Olsen 1. maj 2015 Polaroil-imi pisortap tulliatut atorfineqqaarpoq, ukiullu marlorluinnaat qaangiummata, tassa 1. maj 2017 Polaroil-imi pisortaagallartutut ivertinneqarpoq, tamanna tikillugu Polaroil-imi pisortaasoq Tage Lindegaard aalajangermat Polaroil-imi teknikkeqarneq pillugu pisortatut atorfitoqqani uterfiginiarlugu.

Githa Brask Olsen allaffissornermut inuiaqatigiilerinermullu bachelor-itut Aalborg Universitet-imi ilinniagaqarsimasuuvoq. 1994-miit 2015 tikillugu A/S INI-mi atorfiit assigiinngitsut atorfigisimavai.

KNI-p ikummatissalerinermik immikkoortortaqarfiata Polaroil-ip oqaluttuarisaanerani aatsaat arnamik pisortalerneqarpoq. Ikummatissalerineq naliginnaasumik angutinit suliffigineqarnerusarmat kingumut tamatuma takuteqqippaa, ukiut kingulliit ingerlanerini kalaallit arnat amerligaluttuinnartut atorfinni qaffasissuni takussaaleriartuinnarnerat.

KNI A/S-ip pisortaanera Peter Grønvold Samuelsen ima oqaaseqarpoq:

“Atorfimmut soqutiginnillutik qinnuteqartut arlallit akornanni Githa Polaroil-imi pisortassatut toqqarneqarpoq, ukiut kingulliit marluk Polaroil-imi pisortap tulliatut atorfeqarsimanermigut, qinnuteqartunut allanut sanilliullugu suliassat suunerinik ilisimasaqarlualereersimagami. Anguterpaallu suleqatigigaluarlugit takutereersimagamiuk siuttuunissamut piumassuseqarluni suliassamullu soqutiginnilluarluni.

KNI Polaroil aqqutigalugu inuiaqatigiinni ikummatissamik imerpalasumik pilersuisussaatitaanermigut annertuumik pisussaaffeqarpoq, immeraatigineqarsinnaanngitsumik. Githa-p atorfinitsinneqarneratigut KNI-mi toqqissisimasinnaavugut pilersuisussaatitaanitta isumannaatsumik naammassineqarsinnaajuaannarnissaanut.”

Polaroil-imi pisortanngortoq Githa Brask Olsen ima oqaaseqarpoq:

”Atorfimmut pingaaruteqaqisumut maniguullunga, kisiannili aamma pissangallunga qilanaarlungalu akuersivunga. KNI A/S-imi ukiut kingulliit naleqartitat aallaavigineqartut tapersersorpakka, aammattaarlu Taqqissuut aqqutigalugu KNI-mi sulisunik siuttunillu piginnaanngorsaanerit ingerlanneqartut isumaqatigilluinnarlugit.

Qilanaarpunga suleqaterpassuit pikkorissut tunniusimasullu sineriassuatsinni suleqatigilissallugit. Taakkuupput ikummatissaasivissuarni ullut tamaasa suliaqartut, inuiaqatigiit unittuunnginnissaat qulakkeerinneqataaffigiuarlugu. Massa ukiut kingulliit Nunatsinni nukissiuuteqarneq annertooq erngup nukiganik aallaaveqalersimagaluartoq, taamaattoq ukiorpassuarni suli ikummatissaq imerpalasoq pinngitsoorneqarsinnaasussaanngilaq.”