Simon Olseni pillugu atuakkiaq Kiffartuussivitsinni saqqummersinneqarpoq

Aalisakkanut suliffissuarmi nutaaliaasumi kalaaleq pisortaq siulleq, Simon Olsen, Aqqaluk, pillugu atuakkiaq nutaaq, ’Nipputtartulersuiinnarluta sulissanngilagut’, Kiffartuussivitsinni ullumi saqqummersinneqarpoq.

Simon Olsen Aqqalummik taaneqartartoq 1938-mi Sisimiuni inunngorpoq, 2013-imilu toqukkut qimagulluni.

Aqqaluk angutaavoq immikkuullarissusilik, angut suliaminut suliffimminullu tunniusimalluinnartoq ataqqinnittorlu. Aqqaluk sakkortuumik piumasaqarsinnaassuseqarpoq, kalaallip nammineersinnaassuseqarluni sulisinnaaneranik upperinnilluartoq politikeritullu illoqarfimminik pingaartitsilluni annertuumik siuarsaaqataasimasoq, ilaatigut borgmesteriusimalluni.

Simon Olsenip atuakkiarineqarnissaanut komite aammalu atuakkiortoq Juaaka Lyberth suleqatigiillutik aallarnisaapput. Komite-mi uku ilaasortaapput Peter Grønvold Samuelsen, Malik Berthelsen aammalu Mariane Olsen.

Aningaasaliisut
Saqqummersitsinissamut aningaasaliisuupput KNI A/S, Royal Greenland A/S, Tips og Lotto pulje C, Nuna Fonden, Namminersorlutik Oqartussat kulturimut aningaasaateqarfiat kiisalu Qeqqata Kommunia.
Kiffartuussivitsinni atuagaq ilasseqatigiinnertalimmik ullumikkut. saqqummersinneqarpoq.

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl