Suleqatitsialak 2020

Ukioq kingullertut ullumikkut 4. august 2020 Suleqatitsialaat pingasut toqqarneqarput. Suleqatitsialannik toqqaaneq KNI Katerinnermi Ilulissani ukioq manna pisussaagaluarpoq, COVID-19-ili peqqutigalugu Katerinneq unitsinneqartariaqarsimavoq. Taamaattumik allatut aaqqissuisoqarpoq, tassa Suleqatitsialattut toqqarneqartut KNI-p Kiffartuussiviani Sisimiuni katersuutsinneqarput.  

Suliffeqarfitsinni sumiluunniit sulisut Suleqatitsialattut innersuunneqarsinnaapput, innersuussinermi uku najoqqutarineqassapput:

  • Sulisoq suliffeqarfitta naleqartitaanik, piumasaqaataanik sulisutullu pisinnaatitaaffimminik  naammassinnittoq
  • Sulisoq suliffimminik tulluusimaarutiginnittoq tunniusimasorlu
  • Sulisoq suleqatigiinnermik nuannersunngortitseqataasoq
  • Sulisoq unammillerusussuseqartoq, angusaqarusuttoq pilliuteqarusussuseqartorlu
  • Sulisoq suliaminik ilungersuussilluartoq suliniuteqarluartorlu

Ataatsimut isigalugu sulisoq MALIGASSIUISOQ.

Innersuunneqartut nalilersorneqartarput ukunannga Pisortaaneq, Pilersuisumi pisortaq, Polaroil-imi pisortaq aammalu Sulisoqarnermut pisortaq.

KNI A/S-ip pisortaanera Peter Grønvold Samuelsen tikilluaqqusivoq, Suleqatitsialanngortullu ilisaritippai, inassutigineqarnerini toqqammavilersuutaasut tigusiffigillattaarlugit.

Suleqatitsialak2020-630px-02.jpg

“Asasakka suleqatikka, tamassi tikilluaritsi aammalu ilissi Skype-ikkut peqataasusi tikilluaritsi.
Pingaartorsiorpunga – tassami suliffeqarfissuatsinni KNI A/S-imi Suleqatitsialak-mik toqqaalerpugut.

Siorna KNI Katerinneq 2019 aallartiffigalugu nutaamik periuseqarluta Suleqatitsialak ukiumoortumik KNI Katerinneq iluatsillugu pisartussatut aallarnerparput.

Upernaaq manna Suleqatitsialak-mik toqqaaqqusilluni piffissarititaasup iluani siunnersuutit 26-it tigusimavagut. Erseqqissassavara Suleqatitsialattut inassutigineqarsimasut toqqarneqanngitsulli aqqi aamma inassuteqarsimasut aqqi oqaatigineqartassanngimmata.

Siunnersuutit taakku nalileeqatigiittartunit nalilersorneqarput, nalileeqatigiittartullu isumaqatigiillutik KNI-mi 2020-imi Sulisutsialattut inuit pingasut toqqarpaat, taakkulu maannakkut maani ilisaritinneqassapput.” – Peter Grønvold Samuelsen ilaatigut tikilluaqqusinermini taamak oqaaseqarpoq.   

Siullermik Suleqatitsialattut toqqarneqartoq KNI-meerpoq:

Suleqatitsialak2020-630px-03.jpg

Nukannguaq Olsen, IT-konsulent KNI Kiffartuussivimmi

Nukannguaq Olsen, ullut pingasut qaangiupput 30-nik ukioqalersoq, 2014-imi KNI-p qarasaasiaqarfiani ilinniartunngorpoq 2016-imi naammassisaminik, ilinniagaq taaguutilik Data- og kommunikationsuddannelse IT Supporter – Danmarkimi atuagarsoriartortareerluni angusarissaangaarluni naammassigami agguaqatigiissillugu karakter 10 angusimavaa, inaarutaasumillu misilitsinnermini anguneqarsinnaasoq annerpaaq 12 pissarsiarisimallugu.

Siorna aamma Nukannguaq Pre MBA ilinniagaq qaffasissumik aqutsinermut tunngasunik imalik peqataaffigalugu naammassivaa.

Nukannguaq suliaminut soqutiginnilluarlunilu pikkorissuuvoq, ilinniakkami saniatigut aamma suliamik annertuumik suliaqarnissaminut piukkunnarsarneqarnini iluaqutigilluarlugu naammassisaqarfigilluarsinnaallugu, taamaakkami saaffikkuminartuaannarluni kikkunnulluunniillu assigiimmik sullissisarluni nassuiaalluartarlunilu; ornigulluni sullissineruppata, oqarasuaatikkoorpata imaluunniit allatigut attaveqaatitigoorpata.

Nukannguup sulinermini atortorinngilaa ullormut qanoq innini aallaavigalugu sulineq, ileqqorivaa aamma kinaassusaaniippoq inoqatiminut/suleqatiminut pissuserissaarneq, qungujussinnaaneq aammalu ataqqinninneq.

Naak Nukannguaq inuusukkaluarluni sulinermini (qarasaasialerinerup silarsuaani) misilittagai maannamut annertupput. Ukiualunnguit KNI-mi suligaluarluni KNI-mi qarasaasiaqarfiit arlallit maannamut taarsersorlugit, torersaallugit isumannaallisareernikuuai.  

Nukannguaq Kiffartuussivimmi suleqatiminut aammalu minnerunngitsumik sinerissami suleqatitsinnut kiffartuussilluarnissaq pingaartillugu pikkoriffigivaa. Kialluunniit Nukannguaq saaffigigaangagu, assigiimmik kiffartuunneqarnermik aammalu minnerunngitsumik pitsaassutsimik qaffasissumik kiffartuunneqartuaannarpoq.

Tassuuna takuneqarsinnaavoq Nukannguup suliffimminut tunniusimasuunera, suliffeqarfimmilu Naleqartitagut paasisimallugit sulilluartoq aammalu inunnik assigiinngisitsisuunngitsoq.   

Nukannguaq suleriaatsimini pilersaarusiorluarnermik pingaartitsisuuvoq. Upernaaq manna Nukannguup qarasaasiaqarfiup/servereqarfiup nutarsarnerani takuarput sulianut anginerusunut siulersortaanissaminut sapiissuseqarluni sulisuusoq. Nukannguaq inuttut maniguuttuuvoq ikiuukkumatuujullunilu, imminullu nipituuliutiginani. Suliaminut pikkorissuuvoq, qiimasoq suleqatiminullu illartitsinissamik pingaartitsisoq nuannaartoq.

“Taamaattumik Nukannguaq Suleqatitsialaavoq. Nukannguaq maligassiuisuuvutit. KNI-mi suleqaterpassuatit aqutsisullu tamaasa sinnerlugit ilaquttatillu pilluaqqungaarpagit.” – Peter Grønvold Samuelsen taama naggasiivoq.

Suleqatitsialattut toqqarneqartup tullia Pilersuisumeersuuvoq:

Suleqatitsialak2020-630px-04.jpg


Signe Larsen Kreutzmann, Kangaamiuni niuertoq

1999-imi Pilersuisumi HK lærling-itut aallartissimavoq. 2002-mi 23. august ilinniakkaminik naammassinnissimalluni. Januarip aallaqqaataani 2007-imi Servicelederitut naammassinnissimalluni. Niuertunngorniarneq aamma naammassivaa 1. september 2018.

Signe eqiasuitsutut sullarissutullu ilisaritinneqarpoq. Suleqatitsialattut toqqarneqartussatut inassuteqaateqartut oqariartuutigivaat, ingammik Niuertunngorniareernermi kingornatigut sulisitsisutut periusissani nassaariartoraa, malunnartumillu nammineernerulersimasoq.

Signe tunuarsimaarani, ilakkuminarluni suleqatigiinnermik nuannersunngortitsisarnera maluginiarneqarsimavoq.

Suliffiup iluani suleqatiminut suliffeqarfissuatsinni naleqartitatsinnik erseqqissaajuartuuvoq. Suleqatigiit akornanni tatigeqatigiinneq pingaartilluinnartuuaa. Suliffimminni suleqatigiit pilersaarusioqatigiittarneri ingerlattuartuuai, taamaaliornermigullu suleqatigiit nukittuut ikioqatigiilluartullu pilersikkiartuaarsimallugit.

2018-mi Kangaamiuni niuertunngorpoq, taamaalillunilu suliffeqarfik ingerlalluartoq akisussaaffigilerlugu. Ingerlalluaraluartoq assigiinngitsutigut nutarteriffiusariaqalersimasoq suleqatini ilagalugit kivitseqataaffiginiarsimavaa, tunisat qaffariarsimapput pisisartunillu kiffartuussineq pitsaanerulersissimallugu. Pissutsit unittooratik nutarteriffiujuartariaqarnerat takussutissartalimmik takutissimavaa.

“Taamaattumik Signe Suleqatitsialaavutit. Signe maligassiuisuuvutit. KNI-mi suleqaterpassuatit aqutsisullu tamaasa sinnerlugit, ilaquttatit mininnagit, pilluaqqungaarpagit.” – Peter Grønvold Samuelsen taama pilluaqqusivoq.  


Pingajuattut Suleqatitsialanngortoq Polaroil-imeersuuvoq:

Suleqatitsialak2020-630px-05.jpg

Finn Løvstrøm, Maniitsumi Ikummatissaasivilerisoq

Finni, Finn Løvstrøm, Maniitsumi ikummatissaasivimmi sulilersimavoq 1981-imi aprilip aallaqqaataani, 20-nik ukioqarluni, suli maannamut suliffigisaminik.

Taamanikkut ukiorpassuarni KGH-mi ikummatissaasivimmi sulisitsisuusimasoq Naalagaasaq soraarninngortussanngormat paarlatsissaatut sulilersinneqarsimavoq Formandimit Paulus Lyberth-imit.

Paulusip Naalagaasamit “persorsagaanermisut” Finn sulinermut perorsarsimavaa, suliffimmut tunniusimanermik, suliat eqqortumik pitsaassulimmillu suliarinissaannut, minnerunngitsumillu  peqqissaarnermut.

”Finni suleqatigilerakku ukiut 17-init matuma siorna aalajangersimasutut aammali tatiginartutut takuara. Finni aalajangersimasumik pissuseqarpoq pissutigalugu ikummatissaasivimmi suliassat atuakkat malillugit qanoq suliarineqassanersut ilisimaarigamigit, taama ililluni nippaarissinnaasumik suleqatini eqqortumik sulinissaannik ilitsersortarlugit, kisinnani. Finni suliassanik naammassinnittuuvoq, suliakkiussat ikummatissaasivimmi suliassaappata, allaffimmi suliassaappata sulisunulluunniit tunngassuteqarpata unneqqarissumik uterfiginnittuaannarpoq. Sunaluunniit akisussaassusilimmik tigusarpaa.” – Taamatut Paulus Lyberth oqaluttuarpoq.

Finnip suliffini nammineq pigisatut paarilluarlugu suliffigaa, siuliminit piumasaqarfigineqarnermisut ilinniartinneqarnermisullu massakkut suleqatini piumaffigisarpai ilinniartillugillu.

Maniitsumi ikummatissaasivimmut alakkaasimasut tamatta nalunngilarput qanoq takujuminartiginersoq, quimi smøreoliet assigisaallu torersumik iliorakkat kiisalu allaffik eqqiluillunilu torerluinnartoq.

“Finn, tamakku tunngavigalugit Suleqatitsialaavutit. Finn maligassiuisuuvutit. Suliffeqarfissuatsinni suleqaterpassuatit aqutsisullu tamaasa sinnerlugit ilaquttatillu pilluangaaritsi.” – Ilaatigut Peter Grønvold Samuelsen taamak naggasiivoq.

Suleqatitsialak2020-630px-06.jpg

Suleqatitsialannik toqqaasoqareermat kalaaliminernik, kaffi kaaginillu sassaalliisoqarpoq. 

 

Suleqatitsialak2020-630px-07.jpg

Pisoq internetikkut Skype-kkut malinnaavigineqarsinnaanera sineriammi suleqatitsinnut periarfissiissutigineqarpoq.

 

Suleqatitsialak2020-630px-08.jpg

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl