Unnuk kulturisiorfimmi nuannisartut

Unnuk Kulturisiorfimmi KNI-p Kiffartuussivia arfinerniit qulit tungaanut ammatinneqarmat ornigarneqarlualaavippoq.

Ammatitsisoqarnerani immikkoortortaqarfiit tamarmik ammatinneqarput, pulaartullu ilaatigut Pilersuisoq, Polaroil, Neqi allallu pillugit tusagassinneqarput.

Pilersuisumi ilaatigut immersuititsilluni eqquiniaasitsisoqarpoq, eqquiniaasitsinermi apeqqutit 13-it eqqortumik akisinnaagaanni eqquisoqarsinnaalluni. Polaroilimi meeqqat imeq uuliallu ataatsimoortinneqarsinnaannginnerat misiligarsinnaavaat. Neqimi Nunatta kujataaniit asserpaaluit takuneqarsinnaapput, immikkoortortaqarfinnilu allani nioqqutissaatigut assigiinngitsut aamma takuneqarsinnaapput ulluinnarnilu allaffimmi aamma sulerisarnersugut paasisaqarfiusinnaalluni.

Alakkaasut KNI KNIllu niuerfii pillugit oqaluttuunneqarnermi saniatigut, aamma Nerisarfimmi kaffi kakaavinillu sassaallerfigineqarput, erinarsoqatigiillu Malikkut erinarsorlutik tusarnaagassiilaarlutik.

Meeqqat aamma nuannaarutigeqisaannik balloninik tuniorarneqarput ilaatigullu Nanu Nanuararlu kusanartumik tunuliaquserlugu assiliseqatiginissaannut periarfissinneqarlutik.

KNI-mi Unnuk Kulturisiorfimmi inuit nuannisartut assingi ataani takukkit. Assit allat aamma KNI-p facebookkianut iserlusi takusinnaavasi. Assit alakkakkit imaassinnaavoq imminut, ilaquttatit kammalaatitillunnit takugitit.

Meeqqanut ballonnit nuannaarutaalluarput.

KNI-mi pulaartut pølsevognimi grillikkanik pisisinnaanertik iluarusuutigaat.

KNI-p kiffartuussiviani tunisassiat assigiinngitsut aamma saqqummersinneqarput.

Polaroilikkunni pulaartut imeq uulialu akuleriissinnaannginnerat aamma misilerarpaat.

Sanaartugassanut immikkoortortaqarfimmi meeqqat nuannisartut.