Neqi A/S-imi tunisassiorfimmi pisortanngortussaq
1. maaji 2014 sulilissaaq

Toqoraavik ukiut 60-it sinnerlugit pisoqaassuseqartoq Neqi A/S 2013-imi millioninik marlunnik kisitsisitalinnut nutarsarneqarpoq toqoraavillu ullumikkut nutaaliaavoq. Toqoraaviup assigiinngiiaartunik nioqqutissiortuunissaanik siunertap piviusunngortitsinissaa ineriartortitsinissaalu pillugit sulineq tunisassiorfimmi pisortanngortussap ingerlateqqissavaa.

neqi-as-ny-fabrikschef-630p.jpg

Maanna tunisassiorfimmi pisortaasoq Henning Sønderup pilersaarutaareersutut soraarninngorpat kiisalu pisortanngortussaq Kunuk Albrechtsen atorfimmi paarlaappat, nutarsaanermik sulineq ingerlateqqinneqassaaq. Tassalu assigiinngiiaartunik nioqqutissiortoq toqoraavik ineriartortoq aningaasatigullu imminut nappassinnaasoq, taamalu tapertaasoq nunaateqarnermut aammalu inuussutissanik allanillu nunaateqarnermit nioqqutissianik amerlanerulersitsinermi tapertaasoq.

Kunuk Albrechtsen:
- Suliassaqangaatsiarpugut naammassisassatsinnik. Assigiinngitsut aaqqitassaapput soorlulu siunnerfiit periusissallu nangillugit suliarissagivut. Periarfissat misissorneqassapput, kisitsissaagut nalilersuillutalu, aqqutissallu nutaat misiligarneqassallutik. Sulilernissara qilanaarivara sulisullu peqatigalugit siunissaq eqqarsaatigalugu suliaqarnissarput qilanaaralugu. Anguniakkatta angunissaat qularinngilara.

Henning Sønderup:
- Neqi A/S inuuninni annertuumik ilaasimammat nassuerutigissavara. Ukiut ingerlanerini unammilligassaqarluartarsimavugut, nutarsaanerullu naammassineqarnera nuannaarutigaara. Neqi A/S, taamalu KNI A/S, toqoraavimmik assigiinngitsorpassuarnik nioqqutissiorsinnaasumik aallaavissaqarluartumillu pigisaqalersimapput, tamatumalu anguneqarnissaanut peqataasimanera nuannaarutigaara.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl