Neqi A/S-imi sulisut 50-it nutaat

Ukioq manna savaaqqanik toqoraanissamut inissitassat kingulliit inissinneqarput, tassa sulisut 50-it nutaat suliassanut ilitsersuunneqarmata. Sulisullu taamak amerlatigisut ataatsikkut sulisorineqalernissaat annertuumik suliniutaasimavoq.

Narsami Majoriaq suleqatigalugu Neqi A/S-imi sulisussanik amerlasuunik pissarsiniarneq iluatsilluaqqippoq. Ippassaq marlunngornermi 14. september sulisut nutaat Neqi A/S-ip eqqiluitsuunissamut maleruagassaanut, suleriaasianut  isumannaallisaanerlu pillugu inatsisaanut ilitsersuunneqarput, taamatullu gummissaannik allanillu aamma tunineqarlutik.

- Arlallit sulisorereernikuuagut, allallu nutaajupput. Kantinami sulisut inuppassuit nerisinnissaannut pilersaarusiuleruttorput, teknikerillu maskiinat båndillu tamarmik ajunngitsumik ingerlanersut misissorlugit taamatullu nillataartitsiviit qerititsiviillu ajunngitsumik ingerlanersut qulakkeerniarlugit ulapipput. Taakku saniatigut ikaartaaterput Viking II Igaliku Kujallermut savat savaaqqallu 600-t aallugit aallarnikuuvoq. Sapaatit akunneri arfinillit tulliuttut uumasut 750-it ullormut toqorarneqartassapput, Viking II-llu savaaqqat kingulliit Tasilummut aariarunigit savat savaaqqallu 21.000-it toqorarsimaleriissavagut, Ole Vestergaard, Neqi A/S-imi pisortaq, paasititsivoq.

Toqoraanerup saniatigut Neqip naatsiiat siulliit tigoqqammerpai, taakkulu immikkoortiterneqaleruttorput poortorneqaleruttorlutillu, taamatullu sumiiffinnut ukiukkut umiarsuaqarfiuneq ajortunut nioqqutissat nassiussuutassat aamma suliarineqaleruttorlutik.

Sulisut 50-it nutaat sapaatit akunnerini arfinilinni tulliuttuni piffissaq tamaat sulisuussapput.