Savaaqqanik toqoraaneq naammassilluarpoq

Neqi A/S-imi toqoraaneq maanna piareerpoq, ukioq manna savaaqqat toqorarneqartut amerlassusaat siornamut sanilliullugu taamaaginnaraluartoq ukioq manna savat toqorarneqartut amerleriarput. 

Toqoraaneq naammassivoq, Neqi A/S-imilu pisortaq, Ole Vestergaard, ukioq manna toqoraaneq naammagisimaarpaa. 

- Ukioq manna toqoraanitsinni silagissioqaagut, toqoraallutali aallartikkatta sialussioqaagut, siallingaarmat aqqusernit kuugunneqarput kuuillu supisorujussuullutik, supingaarmatalu savaatillit ilaat savarniarnerminni pikkunartorsiorput, savaatilimmulli ataatsimut aallernissarput kinguartittariaqarsimasarput eqqaassanngikkaanni pilersaarutit sinneri piviusunngortinneqarput. Anorimik sikumillu kinguarsarneqanngilagut, Ole Vestergaard oqarpoq. 

Ukioq manna savat toqorarneqartut amerlanerunerat imaaliinnarlugu pitsaasutut taaneqarsinnaanngilaq, tassami savaatillit ilaat matoorarput nerukkaatissallu akitsoriartuinnarmata savaatillit ilaasa savat ukiukkut katersortarunnaariartorpaat. Taamaattumik aappaagu savaaqqanik piaqqiortitsinissamut tamanna sunniuteqarsinnaavoq. 

Savaaqqap ataatsip oqimaassusaa agguaqatigiisillugu 1,3 kg-mik oqilinikuuvoq, tamannalu 8 %-ip nalingaa. 

- Agguaqatigiisillugu oqimaassusaat taama appasitsiginera nunatta kujataani savaatilinni tamani nalinginnaasumik atuuppoq, taamaattoqarneralu siallerujussuaqattaarnerani panerujussuaqattaarneranillu pissuteqarsoraarput. Neqip pitsaassusaata nalilersortarneranut uuttuutigisartakkavut (orsoqassuseq nukiillu) eqqarsaatigalugit taakku allannguuteqanngillat, Ole Vestergaard ilisimatitisivoq. 

Nersutaatit ukiut tulleriisiinnarlugit toqoraanitsinni annertussusaat agguaqatigiisillugulu oqimaassusaat qaffariarput. 

Nunatta Kujataani tuttuutillit ukiuunerani sermersimanera maluginerluppaat, tassa tuttut nerisassarliorsimammata toqoraanitsinni annertussuseq appariarfiuvoq. 

Neqi A/S-imili akitiginneqartut taamaaginnakannerput. 

- Nerukkaatissanut naggorissaatissanullu pisiortornermut Namminersorlutik Oqartussat tapiissuteqarnerat iluaqutsiullugu akit taamaallaat 1-2 %-imik qaffariaateqartissavavut, Ole Vestergaard naggasiivoq. 

Siornamut sanilliullugu toqorarneqartut amerlassusaat annertussutsillu.