Aasaq manna sila Neqi A/S-imut pitsaavoq

Ukioq manna savaaqqanik toqoraaneq naammasseqqammerpoq, killiffillu maanna tusarliunneqarsinnaanngorpoq.

Takuneqarsinnaasutut kategorit sisamaasuni tamani (tabel ataaniittoq takuuk) uumasut ikinnerusut toqorarneqarsimapput, taamaattorli ataatsimut katinneranni kiilukkaallisimapput. Nersutit agguaqatigiissillugu oqimaassusaata annertuseriangaatsiarsimanerata peqqutigisinnaavaa Galloway aamma Dexter raaciisa akulerunneqarnerat.

Aasaq manna kujataani sialleqattaarnera uumasunut tamanut aamma iluaqutaavoq, tassa uumasut qaqqami naasut ivikkallu nerisartagaat alliartortitsilluarsimammata. Taamatullu kujataani savaatillit nunaateqarnermilu siunnersortit aaqqissuussaasumik piaqqiortitsillutik suliaat aamma malunniutaavoq, kiisalu Neqimi savaaqqanut maskiinamik amiiaat nutaaq aamma sunniuteqaqataalluarsimasinnaalluni.

- Aasaq manna sila nersualaassagukku ukiaq manna sila aamma nersualaartariaqarpara. Septemberimmi qeqqani ullut marluk-pingasut siulliit sila qasikujuppoq, toqoraanerulli sinnerani Narsaq assut silageqattaarpoq. Toqoraaneq naammassimmat aqaguani ukiap silaa ‘eqqortoq’ takkuppoq, siallerluni anorlilerami, Neqi A/S-imi pisortaq, Ole Vestergaard, oqarpoq.
Nangipporlu:

- Toqoraanerup nalaani siallerpat uumasut amii ipertissapput, tamannalu neqaanut sunniuteqarsinnaalluni, uumasullu nakorsaata amip ipertuup nalaani neqi peeqqusarpaat, tamannalu immikkut suliassanik pilersitsisarpoq savaaqqallu neqitsiarsuanik igitsiinnartariaqarnermik aamma kinguneqartarluni. Ukiut siuliini assartuuterput silap aamma kinguaattoortinnikuuaa, toqoraasussat 70-80-it piareeqqagaluarlutik Narsami savaatilinniit savat assartugassagut assartorsinnaajunnaartittarlugit. Ukioq manna tamanna qujanartumik pinngilaq, Ole Vestergaard oqarpoq.
Taamaattumik ataatsimut oqaatigalugu ukioq manna toqoraaneq naammagisimaarluarnarpoq.

Uani tabelimi ukioq kingulleq ukioq mannalu uumasut toqorakkat amerlassusaat oqimaassusaallu takusinnaavatit:

neqi-2021-11-450px-02.jpg

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl