Josef Motzfeldt-ip ull. 22. apriili 2015-imi Pilersuisup nunaqarfinni pisiniarfiit pillugit AG-imut ilanngussaanut akissut.

All./ Finn Fabricius, pisortaq, Pilersuisoq


Aluu Josef Motzfeldt

Pilersuisup nunaqarfinni pisiniarfiini nioqqutissat assigiinngitsut pillugit ilanngussat soqutigalugu atuarpara.

Ilanngussavit aallartinnerani niuertumik Asa Egedemik ilakkuminarluni piumassuseqarluaanerit assut nuannaajallaatigaara, kiisalu pisiniarfik imaqarluarnerarlugu. Pilersuisumi niuertorisatta ineriartornissaat annertuumik sulissutigaarput, tamannaavorlu pisisartunik pitsaanerpaamik sullissinissaanni ineriartortitsineq, kiisalu pisiniarfiup iseruminarluni tuniniaanissaminut piareeqqanissaanut aqqutissiuussisussaq.

Nillataartut amigaatiginerakkatit  - Ymer aamma Cultura – eqqarsaatigalugit Ymer ulluni arlaqanngitsuinnarni piunertussuseqarpoq, kiisalu RAL-ip/RAB-ip 2015-ip qaammataani siullermi angallassinermi pilersaarumminnik allannguinera pissutigalugu sivikinnerpaamik ulloq piusinnaaffiata killinga sioqqullugu nunaqarfimmut apuuppiartarsinaasimanngilarput. Taamaattumik piffissami tassani nunaqarfimmi nioqqutiginiarnatigu aalajangersimalluta. Piffissalli ilaani Narsamiit nunaqarfimmut ymerinik nassiussititsisimavugut – nassiunneqartulli amerlanngitsuinnaallutik. Cultura suli sivikinnerusumik piunertussuseqarpoq, taamaattumik umiarsuaq suliluunniit apuutinngitsoq ulloq piusinnaaffia qaangiutereersimassalluni, taamaattumik Cultura nunaqarfiup nioqqutinik noqqaassutigisinnaasaasa akornaniigani.

Pisiniarfinni mikinerusuni yoghurtinik, qallersuutinik allanillu nioqquteqarumalluta qerisuutillugit tikisittarpavut, qerisuunerisalu sivisunerusumik piunertussuseqartippaat.

Youghurt aamma taamatorluinnaq, tassa qerisutut tikisinneqartarpoq, taassumallu illoqarfinni yoghurtit pisiarineqarsinnaasut asserluinnaraat, sukkoqarnerunngilaq allanillu akuugaanerunani.

Qinigassat

Nioqqutini Igalikumiit noqqaassutigineqarsinnaasuni errorsissutit assigiinngitsut sisamaapput, kingunerutillu assigiinngitsut pingasuullutik. Qiniataagassat akornanniipput “Neutral”, taanna tipigissaatitaqanngilaq. Namminersorlutik Oqartussanut isumaqatigiissut malikkaanni Igaliku errorsissutinik assigiinngitsunik ikinnerpaamik marlunnik, kiisalu kingunerutit ikinnerpaamik assigiinngitsut marluk, pigineqartussaapput. Nioqqutinik noqqaassutissaasuni soorunami avatangiiserput atungarissaarnissarlu eqqarsaatigaarput, nioqqutissalli noqqaassutaasinnaasut “nalinginnaasumik pisiniarfinni noqqaassutaasinnaasut” assigalugit katitigaapput, pisiniarfinni allani nioqqutissanik qiniataagassaqartitsineq assigiinnarpaa inatsisillu malillugit ingerlanneqarluni.

Nioqqutissat sorliit pisisartup pisiarerusunnerlugit nammineq aalajangissavaa – periarfissiinnarpavut.

Kaageeqqanik kaagerujunnillu qiniataagassani nioqqutit piunertussusaat tunngavigalugu ilai piginngilavut. Nioqqutit sapinngisamik sivisunerpaamik piunertussuseqartut qinertarpavut, tamatumani kaagit aamma pineqarlutik. Nioqqutaatitta pitsaassusaat qularnartuusorinngilluinnarpara. Nioqqutaatitsinni tamani inatsisinik malinnippugut, tamanna aamma kaageeqqani kaagerujunnilu atuuppoq. Kaagit suliffissuarni sanaat namminerlu angerlassimaffimmi sanaat pitsaassusaata assigiinngissuteqarnerat qularutiginngilara.

Imigassat kimittuut erngusikuluuniittunik amerlavallaaneraangavit ilumoorputit. Qiniataagassat ikilisinniarlugit piffissami qaninnerusumi misissorumaarpavut.

Nunaqarfinni pisiniarfinni nioqqutissat noqqaasutigineqarsinnaasut katitigaanerat innuttaasut amerlanerit qiniataagassatut kissaataannik tunisaneersuusarpoq. Inerittulli naatitallu kiisalu nillataartut piusinnaassusaat killeqarmata nioqqutit killilimmik pigisarpavut.

Pisiniarfinni siunnersuisooqatigiit

Maanna nunaqarfinni qiniataagassaatitsigut kikkut tamaasa kissaataat eqquutsissinnaanatigit ilisimavarput, niuernerulli tungaatigut pisiniarfimmilu inissaq atorsinnaasarput eqqarsaatigalugu, kiisalu nunaqarfiup angissusaa tunngavigalugu nioqqutigineqartussat Namminersorlutik Oqartussallu isumaqatigiissutiginikuusarput eqqarsaatigalugu, isumaqarpunga maanna nunaqarfinni pisisartut amerlanerit iluarisaannik nioqqutaateqartugut.

Pisisartut kissaataat tusaaniartorujussuuarput, taamaattumik kissaatigineqartunik niuertumut Sisimiuniluunniit sullissivimmut kinaluunniit apuussinissaminut tikilluaqqusaavoq. Nunaqarfinni tamangajanni pisiniarfinni siunnersuisoqatigiinnik peqartoqarpoq, siunnersuisooqatigiit niuertoq ikiortarpaat, siunnersorlugu ikiorpersaartarpaat. Piffissami qanittumi Igalikumi pisiniarfinni siunnersuisoqatigeeqalernisaa suliniutigissavarput.

Neriuppunga ilanngussanni Pilersuisumut tunngasortaanut ajornartorsiutinut taasannut akissuteqarsimassallunga. Sulili akineqartariaqarsoriguit, apeqqutissaqaruit kissaateqarlutilluunniit/oqaaseqaateqarusukkuilluunniit sianerfigiinnarsinnaavarma.

 

Inussiarnersumik inuulluaqqusillunga

Finn Fabricius

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl