Ataqqinartorsuup Dronningip nersornaasiuttagaanik Fortjenstmedalje-mik sølviusumik saqqarmiuliineq

Gerda Jacobsen ukiorpassuarni KGH/KNI-mi sulereerluni nalliortorsiorpalaartumik tallimanngornermi ulloq 20.november 2015 Dronninngip nersornaasiuttagaanik Fortjenestmedaljeamik Paamiuni nersornaaserneqarpoq.

Gerda Jacobsenip nalliuttorsiornera Taqqissuummi ingerlanneqarpoq, tassanilu ilaqutai suleqatikuilu qaaqquneqarput. Aamma erinarsoqatigiit peqataapput.

Pisortaq Finn Fabricius sila peqqutigalugu ajoraluartumik peqataasinnaanngimmat, taanna sinnerlugu tuniniaanerni pisortaq Arne Lyberth Petersen oqaaseqarpoq. 

Ukulu oqaatigineqarput: 

”Asasara Gerda, asasara Nielseeraq, asasakka Gerdap ilaqutai, suleqatit, qaaqqusat – tamassi tikilluaritsi.

Tulluusimaarutigaara KNI A/S sinnerlugu oqalugiaat una saqqummiussinnaagakku. Ulloq tamaattoq pingaartuuvoq.

Ullumikkut ataatsimoorpugut pisimasoq pingaartuusoq malunnartinniarlugu, taamaammallu tamatta ataatsimoornitsigut malunnartitsinissarput pissusissamisoorpoq.

Ataatsimoorpugut Gerda Jakobsen nalliuttorsiutigalugu, taassuma KGH/KNI-mi ukiorpassuit, ukiut 50-it, sulisimanera, ilanngullugulu ataqqinartorsuup Dronning Margrethep nersornaatitut saqqarmiuliuttagaata sølviusup, tunniunneqarnissaa malunnartinniarlutigu.

Taamatut KNI-mi suleqatit nersorniarneqartarnerat qaqutigoortuuvoq, kisiannili nersornaammik saqqarmiuliisarnerit qangarsuarli ingerlanneqartarsimapput. Dronninngimit saqqarmiulerneqarneq tamanut atuuttuunngilaq, taamaammallu ullumikkut taamaaliorsinnaanera assut nuannaarutigivara.

Asasara Gerda – KGH/KNI-mi ukiuni 50-ini sulisimavutit, tamannalu ikittuinnarnik anguneqarsimavoq. Niviarsiannguullutit Avigaani sulilersimavutit. Ukioq 1964, sulisitsisullu, niuertoruseq Nathan Jakobsen. Taamanikkut sulineq nukersornartuuvoq. Nioqqutissat tikittartut tamarmik nammallugit talittarfimmiit niuertarfimmut ingerlanneqartarput, suliarlu taanna akuuffigisarpat. Uannut allannerit malillugu nukersorluni sulineq ilinnut apequtaasimanngilaq inuusukkavillu nukippassuaqarsimavutit.

Avigaani inuusunninni suliassarpassuaqarsimavutit. Ilaatigut niuertorutsip aallaqqanerani taartaasarsimallutit.

Atukkatit pissutaallutik 1975-imi Paamiunut nuuttariaqalersimavutit. Tassani atisaarniarfimmi aallartipputit, tassaniillutillu 2015 ukiakkut soraarninngornissavit tungaanut. Paamiuni atisaarniarfimmi annertuumik suliaqarsimavutit, pisinianut qiviartarnerit tamatigut pitsaasuusimavoq, tamannalu mikinngitsumik niuertarfiup isaatitaanut illoqarfimmilu aningaasarsiornermut sunniuteqarsimavoq.

Ukiuni amerlasuuni sulisunut sinniisuusimavutit. Taamatut tatigineqarlutit suliaqarninni tunniusimallutit soqutiginnilluarlutillu sulisimavutit – ilaatigut aalajangernerit piuminartuinnaaneq ajoraluartut.

Asasara Gerda – ilisarisimalerpakkit 2010-imiit, taamanikkut Pilersuisumi tuniniaasut pisortaattut – salgschef – Paamiunut tikeraarninni. Ilisarilersimavakkit arnatut nukittuutut, nakimaatsutut, tunuarumanngitsutut, pissutsillu qanoq innissaannut erseqqissumik isumaqartutut. Inussiarnersuuvutit, qungujulasuullutit, kisiannili aamma aalajangersimasuullutit. Suliannut pisinnaalluarputit, qularinngilaralu suleqativit arlalissuit illit suleqatiginerit iluaqutigilluartarsimassagaat.

KNI A/S Pilersuisoq sinnerlugu KGH/KNI-mi ukiorpassuarni sulilluarsimaninnut qujaffigissavakkit. Aammattaaq Nielseeqqamut ilaqutannullu qujassut ingerlatissavara. Qularinngilara ukiuni taakkunani aamma mikinngitsumik taakkunannga tapersersorneqartarsimasutit.

Naggataatigut ilinnut ilaquttannullu pilluaqqussut annertooq tunniukkusuppara, siunissamilu pitsaasunik tamanik kissaallusi.

Maanna ataqqinartorsuup Droninngip nersornaasiuttagaa saqqarmioq sølviusoq tunniunniarpara, KGH/KNI-mi ukiorpassuarni aalajaallutit sulisimaninnut nersorniutaasoq, qujassutaasoq. Ilanngulluguttaaq KNI A/S-imit allagartaq ukiuni 50-ini sulilluarsimaninnut qujassutaasoq.”