Ukiut 40-nngorlugit nalliuttorsiortoq

Uummannami suleqaterput Mette Zeeb, 55, KGH/KNI-mi ukiut 40-ngorlugit aasarmanna nalliuttorsiorpoq. Malunnartitsineq pivoq juulip qaammataagaa Uummannami nakorsap illorsuatoqaani Mettep qanigisai suleqataalu katerisimaaqatigineqarlutik.

Mette Zeeb ukiuni 40-ni KGH/KNI-milu ullumikkullu suli Pilersuisup Uummannami pisiniarfiani pisortap tullersortaatut atorfeqartoq 1.Juni 1976 Illorsuarni KGH-p pisiniarfiani sulilersimavoq, kingorna Uummannamut nuukkamik KGH-mi sulinini nangeqqillugu pisiniarfimmi sulilersimalluni.

Mettep suliffimminut tunniusimalluinnarluni piffissamillu ataqqinnilluinnarluni sulini ingerlattuarsimavaa. Mette suliassanut tamatigoortuugami pisiniarfimmi suliassanut assigiinngittunut tamalaanut annertusiartuinnartumik misilittagaqalersimavoq.

Ukiut ingerlaneranni suliffiup iluani aaqqissuussaanikkut akisussaaffinnik annertusiartortunik tigummiaqalersimavoq, aallaqqaammut nalunaaquttap akunnermusiaqarsinnarluni assistentitut kingornalu overassistentitut kiisalu områdelederitut sulilluni, ukiunilu kingullerni arlaqalersuni Uummannami Pilersuisup pisiniarfiani pisortamut tullersortitut inissisimalluni.

Arnaq takuinnarlugu nipaassorinartoq pisortarisaminiit suliassanik tunineqartilluni peqquneqarsimanermisut suliat naammassiuartarpai. Mette Pilersuisumi sulisorpassuit pikkorissut assigalugit suliffeqarfiup siunnerfianik paasinnilluarsimavoq anguniagassanullu annertuumik peqataalluni suleqataavoq.

Mettellu ilaqutai immikkut qujaffigineqarput arlalippassuariarlutik piffissami sivisuumi annertuunik suliassaqartillutik sulinerminni naammangittarlutik tapersersuillutillu kiisalu tunniusimallutik utaqqisinnaasarmata.

Mette Zeebip ukiut 40-nngorlugit nalliuttorsiorneranik KNI A/S-ip pilluaqquaa.

20160711_153526.jpg

Otto Møller, Uummannami quersuup ittua aamma Elise Petersen, Uummannami pisiniarfiup pisortaa nalliuttorsiortoq peqatigalugu ullorsioqataapput.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl