Kangersuatsiaq KNI Pilersuisoq mittarfitsialattut toqqagaavoq

Kangersuatsimi Pilersuisumi sulisut.

Mittarfeqarfiit 2019-imi nunaqarfimmi mittarfitsialammik toqqaapput, tassanilu Upernaviup eqqaaniittoq Kangersuatsiaq KNI Pilersuisoq, mittarfitsialattut toqqarneqarpoq.

- Ukioq kingulleq Kangersuatsimi sulisut mittarfilerinermi aaliangernerit nakkutilliinerillu imaannaanngitsut atorsimavaat, KNI Pilersuisoq qanimut suleqatigilluinnarlugu Kangersuatsiami mittarfik matuneqarpoq, tassani eqqaaveqarfiup qanippallaalernera ilaatigut peqqutaalluni, tassanilu sulisut sulilluarnerisigut matoqqanera sivisusimanngilaq. Tassunalu eqeersimaarnerisa toqqagaanerannut pisooqataalluinnarpoq, Mittarfeqarfimmi mittarfiup pisortaa Karl-Peter Hansen tunngavilersuummini taama allappoq.
Tamanna nuannaarutigineqarluarpoq.

- Avannaani Mittarfeqarfiit qanimut suleqatigillualernikuuagut, tamannalu iluarpoq. Ukioq kingulleq oqarasuaatikkut ataatsimiinnerit aallartinnikuuagut taakkulu ingerlalluarput, attaveqaqatigiilluarnitsigullu suleriutsit qaffassarneqarnikuupput. Taamaammat tulluusimaarutigaara Kangersuatsiaq KNI Pilersuisoq  Mittarfitsialattut toqqarneqarmat, Pilersuisumi Regionschef Jørgen Mathiassen oqarpoq.

Mittarfeqarfiit mittarfitsialammik toqqaaniarnerminni uku atuunnissaat tunngavigisimavaat:

• OPSCOM tassa internet atorlugu ullormut misissuinermi immersuiffittut atortoq Upernaviup eqqaani nunaqarfinni nunatsinni kisimi atorneqartoq, tassanili aamma atortunik pisunillu mittarfilerinermi sunniuteqarsinnaasunik nalunaarsuiffik.
• SAFETY tassa sillimaniarneq assigiinngitsutigut nunaqarfinniit nunaqarfinnut angallannermi sunniutillit tamaasa.
• Nammineerluarsinnaaneq, tassani namminiussuseqartumik sillimaniarneq OPSCOM atorlugu sulisullu tungaatigut ilinniartitsinerit atorneqarneri aaliangersinnaanerillu nammineq annertuut pigineqarneri toqqammaviupput.

KNI Pilersuisup sumiiffinni assigiinngitsuni mittarfilerinerminni suliaasa ilagisarpaat aputaajaanerit, atortunik nakkutilliinerit, usilerinerit silasiornerillu, Upernaviullu eqqaani nunaqarfinni mittarfitsialammik toqqaasarneq siullermeerpoq siunissamilu ingerlanneqartarumaarluni.

Suleqatigut pilluaqquagut :)