Nunatsinni angerlarsimaffinnit 23.000-iusunit
3.000-it KNI Pisisa.gl malinnaavigaat

KNI-mi internetsikkut pisiniartarfik pisisa.gl nunatsinni angerlarsimaffiit 14 procentii nutaarsiassanik nassiussivigisarnerisigut attavigisarpai. ”Siunissami ungasippallaanngitsumi nunarput internetsikkut nerisassaanngitsunik pisiniartarnermi siuttunut ilannguttariaannaavoq,” drift- aamma teamleder Ajaaja Bech Jørgensen oqarpoq. Pequtit, spil´it oqarasuaatillu angallattakkat tunisaanerpaat tallimat akornanniipput.

Nunatsinni internetsikkut pisiniartarneq atorneqaleraluttuinnarpoq. KNI pisisa.gl-imi ingerlatsinermi aamma teamleder Ajaaja Bech Jørgensen naatsorsuineq nutaaq tunngavigalugu paasissutissiivoq, maanna internetsikkut pisiniartarfiup nunatsinni angerlarsimaffiit 23.000-iusut attavigiualernikuuai. KNIp nunatsinni pisisartuni tamaasa nioqqutissanik 20.000-inik sinnilinnik qiniataagassaqarsinnaanerat kiisalu kalaallisut kiffartuunneqarsinnaanerat periarfissikkumallugit siorna pisisa.gl pilersinnikuuaa. Pilersitarlu iluatsilluarpoq. pisisa.gl-imi nutaarsiassanik pisalerniarluni nalunaarsimagaanni pisisa.gl-imi nutaarsiassat neqoorutillu immikkuullarissut pillugut nalunaarfigitittoqartarpoq.

”Nunatsinni siunissami ungasippallaanngitsumi nunarput internetsikkut nerisassaanngitsunik pisiniartarnermi siuttunut ilannguttariaannaavoq. Soorlu Danmarkimi 16-iniit 89-inut ukiullit 72 procentii imaluunniit innuttat 59 procentii siornamiit maannamut internetsikkut pisiniarsimapput. Nunatsinni isorartussusersuarput nassiussalerinermilu unammilligassat eqqarsaatigalugit uagut suli internetsikkut niuerneq angusaqarfiginerusinnaassagunavillugu ilimagilluinnarparput. Danmark Statistikimi kisitsisit aallavigigutsigit nunatsinni innuttaasunit 57.000-iusunit 34.000-ngajalluinaat internetsikkut pisiniartalerumaarput,” Ajaaja Bech Jørgensen oqarpoq.

Najoqqutariligaq nutaaq iluanaarutaanerusoq

Nerisassaanngitsunik nioqquteqartarneq siornamut Pilersuisup pisiniarfiini 65-iusunit, kiffartuussinissami isumaqatigiissutip avataatigut immikkullu pisiniarfittaqartittarnerisigut, nioqquteqarneq ingerlanneqartaraluarpoq. pisisa.gl-ip pilersinneratigut nioqqutit assigiinngitsut amerlanerujussuit nioqqutissanik pisiniartarfitsinniit imaluunniit nioqqusiortumiit toqqaannartumik pisisartumut nassiunneqartalernikuupput.

”Quimi uninngatitsisarneq akisooq sipaarfigalutigu pisisartuvut akikinnerusumik pisisinnaalerput, qiniataagassaqarnerulerlutik sukkanerusumillu tikittoortalerlutik. Taamaalilluta sinerissami KNI Pilersuisup quimini nerisassanut inissaqartitsinerulernerinik kinguneqarpoq,” Ajaaja Bech Jørgensen oqarpoq.

Pilersuisoq uninngasuutikillisaavoq.

“It-mik atuinerput nutarsarlutigu nunatta iluani poortukkanik nassiussisinnaaneq aaqqiiviginikuuarput. Maanna nioqqutit akigissaarluinnartut 1.000-erluinnaat pisisa.gl-imut nuunnikuuavut. Nioqqutaativullu maanna kavaajanik Ganada Goose-nik pilerigineqarluinnartunik nioqqutinillu allanik arnanut tunnganerusunik ilanikuullutigit.”

Nioqqutit tunineqarnerpaat tallimat

pisisa.gl-ip nioqqutit tunisaanerpaat tallimat nalunaarsorsimavai (kaaviaartitanit):

  1. Nalaasaarfiit
  2. Computerimut spil´it
  3. Issiaviit nerriviillu
  4. Reolit amusartullu
  5. Oqarasuaatit angallattakkat

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl