Qeqertarsuatsiaat gasoliamik aniasoorneq unitsippoq

Sisamanngorneq ualilluinnartoq Qeqertarsuatsiaani tankeqarfiup eqqannguani sissamut gasoliamik kuuttoqartoq paasineqarpoq

Sisamanngorneq unnuttoq Polaroilip nalunaarutigaa tankimiit aniasoornerup paasineqarneraniit nalunaaquttap akunneri marlussuit qaangiuttut gasoliep anianera unitsinneqartoq.

Gasoliemik aniasoornermut patsisaassangatinneqarpoq tankeqarfimmi teknikkimut atortut ilaasa ajoquteqalersimanerat. Tamanna maanna Polaroilimiit iliuuseqarfigineqalereerpoq teknikerillu suleqatigalugit iluarsaanneqassalluni.

Qeqertarsuatsiaani qatserisartut Nukissiorfiullu piffissamik atortunillu ikiuunnerisigut tankemit pineqartumiit allamut imaqanngingajattumut gasoliamik nussuineq ingerlanneqarpoq suliarlu taanna aqagu nanginneqassaaq.

Polaroilip naliliineratigut gasolie annerpaamik 2000 literi aniasimasinnaavoq, annikinnerusinnaallunili. Ullut tullinnguuttut paasinarsisissavaat literit qasserpiaat pineqarnersut.

Gasoliemik aniasoqarnera paasineqarniariarmat Nuummi Politiit, Avatangiisinut Pinngortitamullu Naalakkersuisoqarfik kiisalu Kommuneqarfik Sermersuumi teknikkimut aqutsisoqarfik pisoq pillugu ilisimatinneqarput.

Polaroilimut pisortaagallartoq Tage Lindegaard erseqqissaavoq gasoliep tikka nunaqarfimmiunit malugineqanngitsoorsinnaanngikkaluartoq taamaattoq ikuallattoornissamut ernumanaateqanngitsoq.

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl