Tasiusami benzinamik utsersortoorneq

Sinersorluni ikummatissamik assartuutip tallimanngornermi ulloq 24. juni Nanortallip eqqaani Tasiusami benzinamik maqitsinermini Polaroilip ikummatissaasiviata aappaa 100 literip missaanniittumik utsersortoortippaa, tamannalu Tasiusami tipermiutitsivoq.

Utsersortoortoqareernerata aqaguani suli benzinasunnippoq ikummatissaasiviullu ungasinngisaani immap qaani benzinaqarneranik takunnittoqarsinnaasimavoq. Ingerlaannartumik ikummatissaasiviup imaa uuttortaanikkut naatsorsorneqarpoq, paasineqarporlu ikummatissaasivik ussiiffeqartoq, tamannalu ippassaammat maqitsinerup nalaani naqitsinermit pilersimanissaa maannakkut ilimagineqarpoq.

Polaroilip pisortaa Githa Brask Olsen paasissutissiivoq Tasiusami pisoqarneratuut pisunut Polaroilip upalungaarsimanermut pilersaarutaa malinneqartoq, taamatullu pisoqarnissaaanut sulisut suliaqarnissaannut ilitsersorneqarnikuusut sungiusartinneqarnikuusullu. Utsersortoortoqarnera paasineqarniariartoq oqartussat nalunaarfigineqartussat, sulisut sinersorlunilu ikummatissamik assartuisumi inuttat Polaroilip upalungaarsimanermut pilersaarutaa malillugu ilisimatinneqarput.

Qatserisartoqarnermi oqartussat, KNI-mi sulisut sinersorlunilu ikummatissamik assartuummi inuttat aniasoq killilerniarlugu ikummatissaasivik ingerlaannartumik imaarlugu aallartipput ilaatigullu ikummatissamik siammatsaaliutaasussamik assiaqusersuisoqarluni. Ikummatissaq katersorneqarsinnaasoq sapinngisamik aamma katersorneqarnikuuvoq.

Taamatut suliaqartoqarnerata nalaani piffissaq tamaat sinersorluni ikummatissamik assartuuummi inuttat, oqartussat qatserisartoqarfillu qanimut oqaloqatigineqarput.

Annerusumik paasisaqarumagaanni Polaroilimi pisortaq Githa Brask Olsen uunga attavigineqarsinnaavoq gib@kni.gl sianerfigaluguluunniit oqarasuaammut: 86 23 74.

 

 

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl