Polaroil Paamiuni misilitsippoq

Bureau Veritasimiit avataaniit misilitsitsisup Polaroil pitsaalliartuinnarnerarpaa. Aqutsineq eqqarsaatigalugu ikummatissaasivinni niueriaatsit Polaroilip atuutsillualerpai, taakkulu aqutsinermi periutsinut pingaarnernut ataqatigiilluarput.

polaroil-paamiuni-630px-01.jpg
Saamimmit: Tankforvalterimut ikiorti Peter Boassen (Paamiut), Bureau Veritasimit misilitsitsisoq Jens Buus Lassen, Energidirektør Githa B. Olsen, Reidar Poulsen Process Managerimit, Tankforvalter Emil Brastha (Paamiut); Tankforvalterimut ikiorti Isak Høy (Ilulissat), Tankforvalter Thomas Abelsen (Tasiilaq) aamma ingerlatsinermut pisortaq Gerth Jack Storer.

 

Polaroil piffissami 23.-25. august aqqaneq aappassaanik Paamiuni misilitsippoq. Taassuma saniatigut Arsummi tankeqarfimmi misilitsinneq aamma ingerlanneqartussaagaluarpoq, silali ajormat misilitsinneq Kapilisinnut nuunneqarpoq.

Suliffeqarfiit ISO-mik akuersissutillit ukiut tamaasa misilitsittartussaapput, tassani akuersissutinut piumasaqaataasut atuutsinneqarnersut misissorneqartarlutik.
Polaroilip ukioq manna akuersissut ISO 14001 (avatangiisinut mianerinninneq) misilitseqqiffigaa, ISO 9001-ilu (pitsaassuseq) aamma misilittaassutigeqqillugu. 2023-mi Polaroil akuersissummut ISO 9001-imut (pitsaassuseq) misilitseqqittussaavoq.

Polaroilip angusineranut Polaroilimi sulisut tamarmik pattalaarneqarput. Misilitsinnermimi tankeqarfinni ulluinnarni ingerlanerup saniatigut Polaroilimi ingerlatsinerit allat aamma misissorneqartarput. Tassanilu sulisut ataatsimut sulinerat tamakkiisumik isiginiarneqartarlutik.
Polaroilip pisortaaniit Polaroilimi sulisut tamaasa qujaffigineqarput, qujanaq sullarikkassi, ingammik Paamiuni tankeqarfimmi sulisut, ukioq manna Polaroil sinnerlugu misilittaaffigineqartut.

polaroil-paamiuni-630px-03.jpg

Polaroil 2011-mili ISO 9001 standardimik akuersissuteqarpoq. Akuersissut pitsaasumik aqutsinermut systemiuvoq, sulisut suliffeqarfiullu periutsinik, naleqartitanik, nakkutilliinermik nalilersuinermilu ersarissunik suleriuuseqarnissaannik sinaakkusersuisoq, taamaalilluni suliffeqarfik aqutsinermi tunngaviusumik atorneqarluartumillu sakkussaqarniassammat.

Suliffeqarfiup akuersissut ISO 9001 pigiguniuk:

  • Suliffeqarfik isumaqatigiissutinik transparentinik suliaqarsinnaavoq – tunngavik ataasiummat
  • Suliffeqarfiup periusai pitsanngorsarput – taamaasilluni isumalluutit nukiillu asuli atorneqaratik
  • Aqutsisut ataatsimut isiginnilluarsinnaassapput – piviusut aallaavigalugit
  • Sulisut qitiusumik inissisimassapput - akisussaaffeqarnerusinnaallutillu
  • Piffissaq isumalluutillu pitsaanerusumik atorneqassapput
  • Naammagisimaarinninnerulertoqassaaq – aaqqissuussaanerup iluani sullitanilu
  • Suleqatissanik aningaasaliisussanillu peqassaaq
  • Unammillersinnaaneq nukittorsarneqassaaq, pisisartoq qitiutinneqarluni pisisartullu naatsorsuutai ukkallugit
  • Suliffeqarfiup outputsia pitsanngorsarneqassaaq, nioqqutit kiffartuussinermilu tunniuttakkat pitsaasumik akiginnerpaamillu tunniunneqassagamik

Polaroil 2013-imi akuersissut alla aamma pigilerpaa; Avatangiisinut mianerinninnermi aqutsineq ISO 14001:2004. Akuersissutip suliffeqarfiup avatangiisinut mianerinninnermut suliaasa, assersuutigalugu eqqagassat kemikaliallu, anguniarnerini tikkuutilersuisippaa.
Suliffeqarfiup akuersissut pigiguniuk uku angussavai:

  • Sipaaruteqarneq
  • Inatsisit malitassat malinneqarnerannut qularnaveeqqut
  • Suliffeqarfiup avatangiisinut mianerinninnermini suliai oqartussanut sullitanullu uppernarsaatitut
  • Sulinermi atugassarititat pitsanngorsakkat
  • Suliffeqarfiup avatangiisinut mianerinninnermut tunngasunik suliatik pitsanngorsartuassavaat ukkataralugillu

ISO-mik akuersissut ukiuni pingasuni atuuttarpoq, taassumalu kingorna suliffeqarfik misilitseqqittarluni. Misilitseqqinnissap tungaanut ukiut tamaasa misissuisoqartarpoq uppernarsarneqarlunilu ISO-mik akuersissutip piumasaqaatai malinneqarnersut.
ISO (International Organization for Standardization) nunat assigiinngitsut akornanni akuersissutinik tunniussisartuni annerpaavoq ilisimaneqarnerpaallunilu.

polaroil-paamiuni-630px-04.jpg

KNI A/S • J.M. Jensenip Aqq. 2 • 3911 Sisimiut
T +299 86 24 44 • E info@kni.gl