Nunaqarfinni Ikummatissaasivimmi sulisut pikkorissarput

Saamimmiit: Jørgen Lang, Ingivaq Nielsen, Angaju Lorentzen, Markus Eliassen, Ane Stephensen, Paulus Lyberth, Hansine M. Eliassen, Hans Egede Anthonsen, Johan Gedionsen, Kristiane Isaksen, Lars Frederik Karolussen, Kristine Poulsen, Sechmann Enoksen aamma Sikkersoq Møller.

Pikkorissarneq Qaqortumi ingerlanneqaqqammerpoq, pikkorissarnerlu pissanganarpoq pissarsiaqarfiulluarlunilu.

Pikkorissarneq ulluni arfinilinni sivisussusilik Qaqortumi ingerlanneqaqqammerpoq, pikkorissartut katillugit 12-it peqataaffigisaannik. Pikkorissarnermut peqataasut Kommune kujallermi nunaqarfinneersut aammalu illoqarfinneersut peqataapput. 2009-miit, maannamut Ikummatissaasivinni sulisunut pikkorissaanerit 14-nissaat ingerlanneqarput. 

Polaroilimi Ingerlatsinermut Siunnersorti, Paulus Lyberth aammalu HRD-mi Siunnersorti Sikkersoq Møller pikkorissartitsipput. Pikkorissarnerup imarivai; Ikummatissaasivinnik uuttueriaatsit, Atortuutinik aserfallatsaaliineq, Usit navianartut eqqortumik suliarisarnissaat, Pilersuisoq Polaroilillu isumaqatigiissutaat aammalu qaammammut naatsorsuutinik nalunaarsuisarneq. Sikkersup saqqummiippai, Naleqartitat, Suliassat Akisussaaffiillu Sulisunullu quppersagaq.

Pikkorissaasussat Narsarsuarmi silamik peqquteqartumik kinguaattoorput, taamaalillutik pikkorissarnerup aallartinnerani peqataanngitsoorlutik. Qaqortumi suliffeqarfik Diving & Safety Solutions suleqatigalugit ulloq siulleq ikuallatsaaliunermi pikkorissarneq ingerlanneqarpoq, kingusinnerusukkullu ikiueqqaarneq ingerlanneqarluni.

Pikkorissarneq peqataasunit nuannarineqarluarpoq, imminnullu ilisarisimallualerlutik pissarsiaqarfiulluarlunilu. Ikummatissaasivimmi suliassatik akisussaffitsillu suliarinissaanut paasissutissanik nutaanik atorluarsinnaasaminnik pissarsialluarput. Pikkorissarnermi peqataasut ilinniakkatik pisiniarfimminni misilerartussaavat, aammalu suleqatiminnut ingerlateqqittussaallugit. 

Pikkorissarnermut peqataasut pikkorissarsimanermut allagartat assigiinngitsut pingasut pissarsiarivaat. Ikiueqqaarnermut, Ikuallatsaaliornermut pikkorissarnermullu peqataanermut.

Pikkorissarnermut allagartat assigiinngitsut pingasut pissarsiarinerannut pilluaritsi :)

Paulus Lyberth pikkorissartunut tikilluaqqusisoq.

Lars Frederik Karolussen aamma Johan Gedionsen.

Eqimattakkaarnermi suliaqartut.