“Aqerluusaannarsornerup nalaaneersuuvunga”.
14-inik ukioqartunga Kangersuatsiami niuertorutsip KGH-p pisiniarfiani ulloq 1. april 1967 misilinneqarlunga atorfinitsippaanga. Ullut tallimat qaangiutiinnartut pisiniarfimmi sulilivippunga – maannakkut ukiut 56-it ingerlareersut suli KNI-mi atorfeqarpunga. Oqarsinnaavunga, suliffeqarfinni allani sulerusulernikuunngisaannarpunga.
Kangersuatsiami pisiniarfik taamani pisiassanik nammineq tigooraalluni pisiniarfiunngilaq kisianni pisiniartitsiviup saanut qeqqilluni pisiassanik tikkuartuisoqartarpoq, nioqqutissallu tikki tipigissut tamarmik naamaneqarsinnaallutik. Kaffet, paarnarsuit qaqortut, tupat, qisuit allunaasallu – aah, tipigersuaq. Pisiniat pisiassaminnik tikkuartuisarput pisiassaallu uagut isaassortarpavut. Ameerniutaat aamma pisiarisarpavut. Sunannguaq tamarmi aqerluusamik allattoqqissaarneqartarpoq. Taamaattumiguna oqartartunga: Uanga ujaraannarnik sakkoqarnerup nalaaneersuunngilanga – uanga aqerluusaannarmik atortoqarallarnerup nalaaneersuuvunga.
Taamani nunaqarfimmiut amerlanerit assigalugit anaanaga ataatagalu piniarnermik inuuniuteqarput. Taamani suliassarpassuaqartarpoq, taamaattumik qatanngutikkalu suliassanik qaatuussaqajaarpugut. Arfinilinniunngikkunik arfineq-marlunnik ukioqarlunga imertatalerpunga aamaruutissaasorlungalu. Suliassaq nalunanngikkaluarpoq pingaaruteqarlunilu kisianni oqimaattaqaat. Oqarsinnaagunarpunga akisussaaffeqarnissamut pisussaaffeqarnissamullu angajoqqaama ilinniartissimagaannga. Tamannalu pitsaasuuvoq.
Sulinera nuannariuaannarnikuuara sulerusussuttuaannarlungalu kiisalu nukissamik aallerfigisarlugu, aamma akisussaaffeqarneq sunniuteqarsinnaanerlu nuannariuaannarnikuuakka. Tamanna angajoqqaanniit ilikkarnikuuara aammali siullertut pisortarisanniit, niuertorutsimiit, Ole Nielsen-imiit. Niuertoruseq sullerissuuvoq, inuk nuannersoq eqqissisimasorlu – maligassiuisoq. Oqarpoq: Qanoq iliortarnersugut isiginnaassavat paasinngisaqaraangavillu aperiinnartassaatit. Immaqa tamanna ullumikkut eqqumiiginarsinnaavoq, suliassannulli akisussaaffeqarnissannut pisariitsumik ajornanngitsuaqqamillu ilinniartitsineruvoq. Tamannalumi iluatsippoq, tassami ukiut marluk qaangiummata KGH-mi niuernerup tunisassiornerullu iluani ilinniartunngorpunga. Alluitsup Paani niuertorutsitut ilinniartooreerlunga 22-nik ukioqarlunga nuliara angajullequterpullu Kullorsuarmut nuuppugut. Tassani allaffimmiuusoq Alluitsup Paanut nuulermat taarsissagakku.
Ukiut marluk qaangiummata niuertorutsitut atorfinitsinneqarpunga. Nassuerutigissavara merserusuummersimagama, tassani nunaqarfimmi ukiumut qaammatini qulingiluani umiarsuaqarneq ajortumi 180-inillu innuttaasoqartumi ulluinnarni nioqquteqartitsiniarnissamik qulakkeerinnittussanngorpunga. Inuusuttunnguamut akissussaaffik angisoorujussuuvoq, pingaaruteqartuunerali paasilertorpara. Niuertuussaguit pilersuinissamik qulakkeerinninnissamut pikkorittariaqarputit. Nioqqutissat eqqortut piffissarlu eqqortoq tikisinneqarnissaat qulakkeerneqassapput.
Taamaattumik atuisut qanoq pisiniartariaaseqarnerat tunngavigalugu nioqqutinik uninngasuuteqartarnissara qulakkeerniarlugu nammineerlunga atugassannik suliaqarpunga. Siullermik nerisassat taama iliorpakka kingornagullu nerisassaanngitsut. Tamakku tamarmik ullumikkut pissusissamisuuginnarput, taamanili 1976-imi taamaaqqajanngilaq. Upernavimmi ukiumoortumik katerinnitsinni atuisut pisiniartariaasiat tunngavigalugu aappaagussamut noqqaasarnermik aaqqissuussisimanera saqqummiukkakku amerlanerit pisariuallaarnerarpaat atorfissaaqartinnginnerarlugulu. Ukiualuit qaangiummata pisariaqarsorileratarpaat. Tamatuma kingorna “Nioqqutissanik atuinermut takussutissaq” ineriartortinneqarpoq, niuertorutsinit ataasiakkaanit atorneqartalerluni. Nunaqarfinnilu sulisut ilinniartitaanerat aallartimmat ilinniartitsissutinut ilanngulluni, tamanna pilermat niuertorutsit ilaasa “forbrugstal-ip ataataa” -nik taasarnikuuaannga. Quianarpoq – kisianni aamma ilumoortortaqarpoq.
Ukiut ingerlanerini KNI-mi assigiinngitsorpassuarnik suliaqartarnikuuvunga akisussaaffeqartarnikuullungalu, tamakkulu tamaasa tulluusimaarlunga nuannaarlungalu kingumut qiviartarpakka. Assersuutigalugu KNI-mi siulersuisuini siullerni suleqatima qinigaattut ilaasortaanikuuvunga, suliassaq tamanna assut pissanganartuuvoq. Ukiuni maannamut aqqanilinni nioqqutinik piniagaqarnermi suliaqarpunga. Qitiusumik nioqqutissanik piniartarfimmi cvb-mi Varecontrolleritut atorfeqarlunga.
KNI-p ukiuni kingullerni 56-ini ingerlasimanera malinnaaviginikuuara sulilu akuuffigalugu. Allattaavissuarniit, aqerluusaannarsornermiit telegrammimut internetsimullu, teamsikkut ataatsimiinnernut mobilikkullu nunarsuarmut tamarmut attaveqarnermut.
Suliffiga uannut pingaaruteqartuaannarnikuuvoq, aammali suliffiup avataani sunngiffiga pingaaruteqartuaannarpoq. Taakkulu qanoq oqimaaqatigiisissanerlugit paasilertorpara: Sulinermi pisussaaffimmik eqquutsitsigaanni sukumiisumillu suligaanni isumakuluuteqarani soraarnissaq ajornnaginnerusarpoq – taamalu ililluni ilaquttat ikinngutillu najorlugit nuannisaqatiginissai ajornannginerusarpoq.
