KNI-p Najaaraq Christiansen aningaasaqarnermut pisortatut (CFO) atorfinitsippaa

Najaaraq Christiansen INI A/S-imi aningaasaqarnermut pisortaasimavoq, tassani aningaasaqarneq aamma IT-mik suliaqarfiusut akisussaaffigisimallugit, tamatumalu saniatigut suliffeqarfimmi aaqqissugaasumik aningaasaqarnermik aqutsinermik, digitaliseriinermik, aqutsinermut tunngasunik kiisalu aaqqissuussaanerup ineriartortinnissaanik akisussaaffeqarsimalluni.

Siammasissumittaaq misilittagaqarluni Naatsorsueqqissaartarfimmit, Tusassimit aammalu qitiusumik siulersuinikkut kiisalu inuiaqatigiinni aningaasaqarnermut tunngasunik suliaqartarsimavoq. Tamatuma saniatigut siornatigut ukiut arfinillit KNI-p siulersuisuiniissimavoq, tamannalu suliffeqarfimmut toqqaannartumik ilisimanninneranik, suliffeqarfiup siunertaanut aammalu KNI-p sinaakkutitigut immikkut atugassarititai atorlugit sulisoqarneranik ilisimannilluni.

Pisortaaneq Jeppe Jensen oqarpoq:
“Aningaasaqarnermut piginnaasat nukittuut, aqutsinermik misilittagaqarneq aammalu Kalaallit Nunaannik ilisimannilluarneq Najaaqqap piginnaasarai. Tamatuma saniatigut suliffeqarfiup siulersuisuini suliaqarsimanini aallaavigalugu KNI ilisimalluarpaa. Tamanna pitsaasumik aallaaviliilluni suliffeqarfiup aningaasaqarnerata ineriartorteqqinnissaanut aammalu siunissamut anguniakkanut tunngaviliilluarpoq. Taamaammat Najaaqqap atorfimmut kajumilernissaa iluatsimmat assut nuannaarpunga.

Najaaraq Peter Wistoft taarserlugu atorfinissaaq, Peter Wistoftip aningaasaqarnermut pisortatut tunuarnissi aalajangerpaa, taamaakkaluartoq ukiuni aggersuni KNI-mi piffissap ilaani suliaqartarumaarpoq.

Najaaraq Christiansen oqarpoq:
“KNI suliffeqarfiuvoq ukiuni amerlasuuni ilisimasaqarfigilluarsimasara assullu ataqqisara. Aaqqissugaanerup ilaanniilernissannut qilanaarpunga, aqutsisut aamma suleqatit peqatigalugit suliffeqarfiup ineriartorteqqinnissaanut tapertaanissannut qilanaarlunga.

Najaaraq Christiansen cand.scient.adm.-itut ilinniarsimasuuvoq, Naatsorsuuserinermi aamma Aningaasanut Aqutsinermi HD-qarluni maannalu MBA-mik ingerlatsilluni. Atorfigisarsimasamini aningaasaqarnermik aqutsinermik, misissueqqissaarnermik, digitaliseriinermik kiisalu aqutsisutut nalunaarusiornermik suliaqartarsimavoq, aammattaaq Aningaasaqarnermut Siunnersuisooqatigiit siulittaasoqarfianni ilaasortaasimalluni.