KNI-p ukiup affaanut nalunaarutaa 2025/26

KNI A/S ukiup naatsorsuiffiusup 2025/26-p affaani siullermi akileraarutit akilinnginnerini 86,8 mio. kr.-nik sinneqartoorpoq, angusat siorna ukiup taama ilinerani tassaallutik 59 mio. kr.

Ukiup affaata ingerlasimanera

KNI A/S-ip ukiup naatsorsuiffiusup affaani siullermi 1.405 mio. kr. kaaviiaartippai, taakkulu siorna ukiup affaanut siullermut naatsorsuutinut sanilliullugu 40,8 mio. kr.-inik ikinnerupput. Angusat agguataarput nioqquteqarnermik ingerlatsiviup angusaasa 97 mio. kr-nik ikileriarnerinik kiisalu ikummatissaqarnermut ingerlatsiviup angusaasa 56 mio. kr.-nik amerleriarnerinik.

Nioqquteqarnermut ingerlatsivimmi angusat ikileriarnerat poortuutissat pillugit nalunaarutip nutaap kinguneranik immiaaqqanik/sodavandinik quersuartigut tunisakinnerunikkut annaasanik Kangerlussuarmilu akitsuuteqanngitsunik nioqquteqarnerup matuneranik pingaarnertut tunngaveqarput, kiisalu tupanik quersuartigut kaaviaartitaqarunnaarnermit. Ikummatissaqarnermut ingerlatsivimmi angusat qaffariarnerat ikummatissat siornamut sanilliullugu maanna nalinginnaasumik akeqartinneqarlutik tuniniarneqarnerinik tunngaveqarpoq, tassami siusinnerusukkut iluanaarutaasarsimasut akinik qaffatsitsinaveersaarutitut atorneqarnikuupput.

Piffissami angusani pingaarnertut pissutaavoq kiffartuussinissamik isumaqatigiissutip avataani ikummatissamik tunisat naammaginartorujussuunerat, tassa umiarsuarnut takornariartaatinut, kilisaatinut allanullu tunisat ilimagisamiit annertunerusimallutik.

Nioqquteqarnermut ingerlatsivimmi atugassarititaasut allanngoraluartut kaaviiaartitassaraluanillu annaasaqaraluarluni niuernermik ingerlatsinermini naleqqussaanermigut sinneqartuulaarpoq. Uninngasuutit naleqqussartariaqarnerat iluatsittumik ingerlanneqarpoq, nioqqutinilli qiniataagassaqartitsinermik naleqqussaaneq kiisalu periusissiornermi suliniutit ilaat suli sunniuteqanngillat.

Ukiumut naatsorsuutigineqartut

KNI-p ukiup naatsorsuiffiusup 2025/26-p affaani kingullermi ukiup affaanut siullermut sanilliullugu angusassani ikinnerujussuunissaat naatsorsuutigaa. Ingerlatsiviit marluullutik sinneqartuulaaginnarnissaat naatsorsuutigineqarpoq.

Uani naatsorsuutit takukkit.