Meqqusaalik Danmarkimi tupigusutsitsivoq

Danmarkimi pinialuttartut atuagassiaanni Jærgernes Magasinimi piniariarluni qaatiguuni pitsaanerpaatut nersorneqartoq

Martsimi sapaatit akunnerisa naanerisa ilaanni nillasulluni, siallersumi anorlersumilu Malik annoraaq qarlippaallu Meqqusaalimmeersut Jægernes Magasinimiit misilerarneqarput. Misileraasut assut pitsaasunik naliliipput, Malik Annoraarlu piniariarnermi qaatiguuni pitsaanerpaatut nersorneqarpoq.

Danmarkimi aamma nioqquteqalernermi Meqqusaaliup pingaarnertut nioqqutissiaatai KNI-p Jægernes Magasinimut nassiuppai, nassiussinermilu atisat Danmarkimi inunnit atuisussanit Meqqusaalimmeersunik misiliineqanngitsunut misileriarlugit nalilerneqarnissaat siunertaavoq.

Naliliisut allapput:

Ilisarnaat Kalaallit Nunaanneersoq sooruna isumaqarluartoq – aamma maani

Meqqusaaliup soqutiginaqutaasa ilagaat “silamiaasit atugassiaannaannginnera”. Oqaluttuassartaa (atoruminarsarneqarneralu) Kalaallit Nunaanni ulluinnarni, sulinermi, piniarnermi aalisarnermilu eqqortunik atisaqartariaqarnermut tunngalluinnarpoq – atisammi atoqattaaginnavinneqarnissaminnut ninngusuuliaasussaapput. Namminneq nassuiarpaat annoraaliatik siulliit piniartut aalisartullu suleqatigalugit misilerarsimallutikkit, atisallu silarluttumi, nunaannarmi, piniariarnermi ulluinnarnilu peqqissaarussivallaartariaanngitsuni atorlugit misilerarneqarsimallutik – misileraanermilu naliliutigineqartut tunngavigalugit ullumikkut pisiarineqarsinnaasut ineriartortinneqarsimallutik.
Oqaluttuatoqaataat naapertorlugit toornaq Meqqusaalik inunnut issimut ulorianartunullu sunut illersuisuuvoq. Anersaarsiorpalaarneruvoq – aammali ilisarnaat qaatiguumut ikkutiinnagaanani atorluarsinnaasuusoq malunnarpoq.
Nammineerlutalu tapersersussallutigu nuannarisarput: Kalaallit Nunaanneersunik ilisarnaatilinnik pisinermi Kalaallit Nunaanni inuussutissarsiorneq oqaluttuaataallu aamma tapersersorneqassapput. Nittartakkatigoortitsilluni Danmarkimut tuniniaaneq 2025-mi ammarneqarpoq, ilisarnaallu uagutsinnut amerlanerusunut nutaajuvoq.

Akii nalingallu – pitsaassutsiminnut sanilliullugit akigissaarluinnarput

Akit naleqqersuunneqarsinnaajuaannartuupput. Sunaluunniit attuuasinnaasarput qiviariarutsigu (atortut, sannai, immikkoornersat annikitsualuit suullu atugassiaanerinut misiginerit) isumaqarpugut Meqqusaalik soqutiginarluinnartumut inissittoq.

Meqqusaalik akikitsuaqqatut pisiassaataanngilaq – taamatulli atisaliat ninngusuujunissaat, oqornissaat teknikkikkullu sannaat (soorlu imermik seqqartartinnerminni pitarneqarsinnaannginnerinut oqorsaataalluarnerinullu tunngatillugu) qiviarutsigit akigititat taamatut nioqqutissianut allanut sanilliullugit akikinneroqaat.

Nalinginnaasumik misigisarput

Fynimi sapaatip akunnerata naanerani sialleqattaarluni nillertittaarlunilu kiatseqattaartumi misilerareerlutigit paasisaqarluarpugut: Meqqusaalik atugassiatut sanaajuvoq. Silami nillertumi issittumilu piniariarluni atugassaqqilluinnartuuvoq.

Oqorluinnarput; issikisaartillugulu oqorpallaangajassinnaappulluunniit – tamannalumi uppernarsaataaginnarpoq issi anorilu “iluaalliuutaalaaginnaratik” aammali ajornartorsiortitsisinnaasut. Atisat masattumit pitarneqarsinnaannginnerisigut ninngulluinnarnerisigullu silami atugassiani qajaannaalluinnartut ilagaat.
Allaaserisaq tamaat uani atuaruk.

KNI-mi pilerisaarusiornermi pisortaq, Anders Stenbakken:

Malik Annoraap qarlipaallu Danmarkimi akuersaarluarneqarnerat soorunami nuannaarutigeqaarput. Tupaallallunga oqarnianngilanga, atisalli kiannerusumi qanoq igineqarumaarnerat soorunami pissanngatigisimavarput. Sialuttalimmik anorlernerata 2-11 gradimi misilittarneqarput.

Atisaliassani nutaani Meqqusaalimmiit maannakkut  F. Engel Konfektion A/S suleqatigineqarpoq, ninngussutsit oqussusaallu allanngornatigit atisat oqilisassavavut annoraaminerillu tasinnerutissinnaasuliarissallutigit – atisanik atuisussat suli aalalluarsinnaaqqullugit. Atisaliassavut nutaat taaguuserpavut MALIK27, taakkulu Danmarkimi nunatsinnilu tuniniagaassapput.