Ajoraluartumik amerlanerujartuinnartut kræftimik eqqorneqartalerput. Taamaattumik ataatsimoornissaq pingaartuuvoq nuna ataasiuppat, aammali inuiaqatigiittut, ilaquttatut sanilitulluunniit. KNI-mi Neriuffiup nunami maani suliaa pingaartoq tapersersorparput.
Ukiut tamaasa nunap inui 170-it kræftimik nalaanneqartarput, napparsimalersorli kisimi eqqugaaneq ajorpoq, ilaqutariilli tamarmik eqqorneqangaartarput. Eqqortumillu nakorsartiffissaq ungasippat inuttut aningaasaqarnikkullu eqquisarpoq.
Qujanartumilli Neriuffik pitsaasumik siunnersuisinnaavoq, suliarujussuarlu ingerlallugu siunnersuinikkut, aningaasatigut tapersersuinikkut, paasissutissanillu sanaartornikkut ilaqutaasunut kræftimillu napparsimasumut namminermut. Suliaq tamanna KNI-mi tapersersorparput naneruuserfiutitta Pilersuisup pisiniarfiini tamani knidesign.gl-imilu tuniniarneratigut.
Naneruut neriuutaavorlusooq tamatta ikitseqataafigisinnaasarput tamatta ataatsimoorluta tapersersuinitsinnik takutitsinitsigut.
Naneruuserfik ataaseq tunineqaraangat Neriuffimmut toqqaannartumik 20 kr.-inik tapiissuteqartarpugut. Ukioq kingulleq 100.000 koruuninngorsimapput, tassani naneruuserfiit tuninerininngaanneerlutik kiisalu sulisut katersaanneersuullutik. Neriuppugullu ukioq manna aamma aningaasanik amerlasuunik suliaq pingaartoq taanna tapersersinnaassallugu.
Inooriaatsimik allannguineq inuunernik annaassisarpoq
Kisianni aamma allatut iliorluta kræfteqalersinnaanerput millisarlugu immitsinnut tapersersoqatigiissinnaavugut. Siusinnerusukkut nakorsiarnissaq ikioqatigiiffigisinnaavarput, taamaalilluta siusinnerusukkut katsorsaaneq aallartissinnaalersillugu. Kisianni aamma ulluinnarni peqqinnarnerusunik qinersinitsigut immitsinnut tapersersoqatigiissinnaavugut. Ilisimatusaatimmi ersersippaat inooriaatsimik allannguinerit inuunernik annaassisinnaasartut. Allannguerujussuartoqarsinnaavoq tupamik pujortarnermik imigassanillu aalakoornartulinnik atuinerup killilersornerisigut aammali minnerusumik allannguisoqarsinnaavoq soorlu sodavanditorani imermik imernikkut, imaluunniit qaqortuliartorpallaarani iffiamik annerusumik nerinikkut. Tamakku aalajangiussinerit mikigaluartut tamarmik inuiaqatigiittut peqqissutsitsinnik aalajangiisuusinnaapput.
Taamaattumik KNI-mi pingaartillugu suleqatitta pisisartuttalu oqimaaqatigiilluarnissaat samminiagaraarput. Ulluinnarnili allannguinerit anguneqarsinnaasut uagut nammineq naleqqiuffigisinnaasagut anguniarlugit. Tamakku peqqinnartunik iganermi Mamarisavut.gl-imi ilitsersuutinik siunnersuinitsigut, seqummarlutunik iffiukkanik nerinissamik, naatitartornermik aalisagartornerunissamillu kaammattuuteqarnitsigut anguniarparput, timit peqqissut oqimaaqatigiissullu pilersinniarnerini. Ulluinnarnimi oqimaqatigiilluarneq peqqinnermut inuiaqatigiinnitsinnullu sunniuttarpoq. Nukissaqarluarnermi sulerusunnermik akisuussaaffimmilu tigusinissami inuiaqatigiit imminnut napatittut pilersinniaraanni pinngitsuugassaanngilaq.
