Nielsine Johnsen ukiuni 40-ni sinnilinni KGH-mi, kingornalu KNI-nngortumi, sulinikuuvoq. Ullumikkut Napasumi niuertuuvoq. 1982-imi inuusuttuulluni alapernaasseruttorlunilu sulilerpoq, sulininilu nuannaralugu eqqissinaralugu paasilertorpaa. Misigissuseq taanna sulinermini misigiuartarsimavaa.
“Suliartornissara qilanaariuaannarnikuuara – pingaartumik ulapaareernikuulluta suut tamaasa torersareersimallutigit. Tamanna ullaakkut oqinnerutitsisarpoq.
Sulileqqaarami ukiut siulliit eqqaamalluarpai. Aqqaneq-marlunnik suleqateqarluni sulilerpoq, sulinermilu periutsit ilikkalertorpai. Sunniuteqarnerpaamik misigisaqarfiginikuusaa aqutsisuunngilaq – tassaallunili eqqiaasoq.
Eqqiaasup ilumoortumik tasissiullugu sukumiisumik suliaqarnermik ilinniartippaa: matut tigummivii kumitsittarpai matserfiillu savimmik kiliortortittarlugit, suna tamaat qillariinnanngortillugu. Oqittorsiornerinnaasarsimanngilaq, kisiannili torersuutitsineq, peqqissaarneq suliffimmullu ataqqinninneq Nielsinep paasilluarpaa. Piffissallu ingerlanerani taamatut misigiuartarsimavoq.
Niuertutut pisiniarfimmiutullu anguniakkat, pisiniarfiup imaqarluarnissaa aningaasaqarnerullu aqunnissaa pingaartittuaannarpai. Akikilliliisarneq, aningaasartuutit allaararpassuillu malinnaavigalugit maluginiagassaanerat taavaa. Tassa taakkorpiaapput sulinerminik nuannarinninneranut pissutaasut.
Suliffiup iluani silaannap nuannernissaa pingaarteqaa:
“Sulisut nuannaaraangata uanga aamma nuannaartarpunga.”
Upperisaqarneq Nielsinemut pingaaruteqarpoq. Meeraagallarami anaanaata sapaatit tamaasa naalagiartarnissaanik kajumissaartarsimavaa, ukiullu ingerlanerini upperisaq soqutigineruleriartorsimavaa. Sumiikkaluaraangamiluunniit oqaluffimmukartuaannarpoq. 2017-imi ajoqinngorniartoqalermat ajoqinngorniarniarluni aalajangerpoq.
“Ajoqiulluni nuannernerpaaq tassaasarpoq naalagiareernerup kingorna naalagissat nuannisarsimaneraraangata. Taava imminut oqarfigisarpunga ajunngitsumik naalagiartitsisimallunga.”
Taamatut ukioqalereerluni nutaamik ilinnialissagaanni sapiissuseqartariaqarpoq, taamatulli iliorneq Nielsinemut pissusissamisuuginnarsimavoq. 50-iliigamili ilinniagaqaqqinnissaminik eqqarsaateqartarsimavoq, periarfissaqaleriaramilu periarfissamik atorluaavoq. KNI-mi sulinini suli nuannarigaluarlugu aammali nutaamik allaanerusumik alloriarfeqarnini aallartippaa.
Ukiorpassuit ingerlanerini ataatsimiigiartarsimavoq pikkorissariartarsimallunilu. Tamakku ilagaat 2013-imi Danmarkimi katerinnertik – eqqaamasai tassaapput ataatsimoorneq, nuannisarneq sumullu pingaarutilimmut ilaanini. Sulinermini pingaarutilittut isigiuaannagaa tassaavoq: kivitseqatigiinneq tapersersoqatigiinnerlu.
Nielsinep oqaloqatiginerani malunnarpoq KNI-mi naleqartitat aamma nammineq naleqartitai imminnut attuumassuteqartut. Allat suliartunnginnerini siulliulluni suliartortarpoq, akisussaaffimmik tigusilluni, sulilersut ikiortarlugit suullu qanoq pitsaanerusumik suliarisinnaanerlugit eqqarsaatigisarlugu. Torersumiikkaangami iluarinerusarpaa kiisalu pisiniarfimmi nunaqarfimmilu suleqatigiittoqarnissaa pingaartittarlugu.
“KNI uannut pingaaruteqaqaaq. Suliffik toqqissisimanartoq sorpassuartigut ineriartorfiusoq.”
