KNI A/S ukiup naatsorsuiffiusup 2024/25-p affaani siullermi akileraarutit akilinnginnerini 64 mio. DKK-nik sinneqartoorpoq. Angusat siorna ukiup taama ilinerani angusanit 76 mio. DKK-nik ikinnerupput. Angusat immiaaqqanik sodavandinillu amerlasuukkaanik tunisaqartarnermi ingerlatat ikileriarujussuarnerinit kiisalu ikummatissanik tunisaqarnermi ukiut siuliini sinneqartooruterpassuit atuisunut iluaqutissanngortitsinissamik aalajangernermit sunnerneqarput.
Ukiup affaata ingerlasimanera
Kaaviiaartitat 1.446 MDKK-put siornalu ukiup affaanut nalunaarummut sanilliullugit ikileriarput, kaaviiaartitammi siorna 1.575 MDKK-put. Kaaviiaartitat ikileriarnerinut pingaarnertut pissutaavoq ulloq 1. januar 2024 aallarnerfigalugu poortuutissat pillugit nalunaarutip atuutilerneratigut nunatsinni sumiiffinni tamani immiaaqqanik sodavandinillu tuniniaanissamut tamanut ammaassinissap kingunerisaanik nioqquteqarnermik ingerlatsiviup kaaviiaartittagaasa annaaneqarnerat.
Nalunaarutip nutaap atulerneratigut Nuuk Imeq immiaaqqanik sodavandinillu nioqqutissiorunnaarpoq, Nuuk Imerullu nioqqutissiaanik KNI ukiuni qulikkaani siammarterinermik akisussaanikuunera atorunnaarpoq. Pisisartorisimasavut amerlasuunik pisiortortarsimasut immiaaqqanik sodavandinillu Danmarkimiit toqqaannarlugu pisisalerput, septemberimilu amerlasuunik pisisartorisarput kingulleq KNI-mik suleqateqarunnaarluni nalunaarpoq. Tamatuma kinguneranik nioqquteqarnermik ingerlatsiviup isertitai ikileriarput.
Kangerlussuarmi ingerlatat ikileriarujussuarneranik kinguneqartumik Nuummi mittarfiup timmisartunit nunanit tamalaaneersunik miffigineqarsinnaasup ammarneratigut nioqquteqarnermik ingerlatsiviup isertittagaanut siunissami pitsaanngitsumik kinguneqassaaq. Pisiniarfik mittarfimmi akitsuuteqanngitsunik nioqquteqartoq matuneqarpoq soorluttaaq Kangerlussuarmi innuttaasut 20 %-iisa nuunnissaat aamma naatsorsuutigineqartoq.
Ikummatissaqarnermik ingerlatsiviup isertitai siornarnit ikinneroqaat. Ikummatissat imerpalasut akikitsumik pisiaralugit qularnaarneqarnikuusut uninngasuutaasullu 2024-mi nungupput, ikummatissanillu nutaanik pisiortorneq 2021-2023-mut sanilliullugu akisunerujussuuvoq. Atuisut pisiortornermi akit qaffariarujussuarnerinik eqqorneqarnissaasa ingalassimatinnissaa qulakkeerniarlugu ukiut siuliini sinneqartoorutaasarsimasut atuisunut iluaqutissanngortinneqarnissaat aalajangiunneqarpoq. Tamanna atuisunut iluaqutaassaaq, akerlianilli ikummatissaqarnermik ingerlatsivimmut sunniuteqarnerlussaaq, tamannali KNI-mut ajornartorsiortitsilernaviarani.
Kiffartuussinissamik isumaqatigiissutip avataatigut ikummatissaqarnermik ingerlatsiviup isertitai umiarsuarnik takornariartaatinik orserusuttartunit pitsaasumik suli sunnerneqarluartarput, siornamulli sanilliullugu appasinnerullutik. Umiarsuit takornariartaatit sikorsuarnik pissuteqartumik 2024-mi angalaniarnerat ajornartorsiorfiusimavoq, tassami nunatsinnut tikittussaagaluit arlallit tikinngiinnarsimapput.
Ukiumut naatsorsuutigineqartut
KNI ukiup naatsorsuiffiusup 2024/25-p affaani kingullermi ukiup affaanut siullermut sanilliullugu angusassani ikinnerussasut naatsorsuutigaa, taamaattumillu nioqquteqarnermik ingerlatsivimmi aamma ikummatissaqarnermik ingerlatsivimmi angusaasa siornamut sanilliullugu ikinnerujussuunissaat naatsorsuutigineqarluni.