KNI A/S niuernermik ingerlatamini annertuumik naleqqussaanikuuvoq. Naleqqussaaneq 2025/26-mi ikummatissaqarnermut ingerlatsivimmut aammalu nioqquteqarnermut ingerlatsivimmut sunniuteqarluarpoq sulilu ikummatissat akiisa allanngorannginnissaat qulakkeerneqaqqalluni, naak nunarsuarmi akit qaffakkaluaqisut.
KNI A/S-ip, nunatsinni najugaqarfiit mikinerniit anginernut ulluinnarni nioqqutissanik ikummatissamillu pilersuinissamik akisussaasup, akileraarutit akilinnginnerini ukiumi naatsorsuiffimmi 2025/26-mi 152,4 mio. kr.-inik iluanaarutigai.
Angusat siorna naatsorsuiffimmi angusanit pitsaaneroqaat, siornami akileraarutit akilinnginnerini angusat tassaapput -83,2 mio. kr. Akileraarutit akilinnginnerini 200 mio. kr. sinnerlugit pitsanngoriarput.
Angusat assut naammagisimaarnarput. Pingaartumik KNI-p niuernermi periuseq atugaata tunngaviatigut eqqarsaatigeqqinneratigut pitsanngoriaateqartoqarmat aammali innuttaasut atuisullu ataqqillugit allannguineq ingerlanneqarluni. Angusat allatut oqaatigalugu takutippaat inuiaqatigiinnut akisussaaffeqarneq niuernerlu KNI-p ataatsikkoortillugit ingerlassinnaagai.
“KNI ukiut 250-it sinnerlugit nunatsinni nioqquteqarnermut ikummatissaqarnermullu immikkut suliassaqartuarsimavoq. Taamaattumik atuisunut sapinngisamik akigissaartitsinissaq oqimaaqatigiisittussaallutigu aamma pilersuinissamik qulakkeerinninnissatsinnut KNI-p ingerlatsinissaanut aningaasaliinissaq aamma ilanngullugu qulakkeertussaavarput. Taamatut oqimaaqatigiissitsiniaaneq 2025/26-mi eqqorluarsimagipput isumaqarpunga, ilaatigut nunarsuup sinnerani ikummatissat akii qaffakkaluaqisut ikummatissanut akit allanngorannginnissaat qulakkeersimallutigu,” KNI-p pisortaanera, Jeppe Jensen, oqarpoq.
Ingerlatsiviit suliffeqarfiutigisallu tamarmik sinneqartoorput
KNI-p niuernermik pingaarnertut ingerlatai immikkoorput tassaallutik ikummatissaqarnermut ingerlatsivik nunatsinni najugaqarfinnut tamanut ikummatissanik pilersuisuusoq aammalu umiarsuarnut takornariartaatinut, kilisaatinut timmisartunullu ikummatissamik tuniniaasuusoq kiisalu nioqquteqarnermut ingerlatsivik nunatsinni tamarmi siammarsimasunik sumiiffinni 64-ini 67-inik pisiniarfeqartoq.
Ingerlatsiviit tamarmik 2025/26-mi pitsaasumik ineriartorsimapput.
Ikummatissaqarnermut ingerlatsivik akileraarutit akilinnginnerini 116,2 mio. kr.-inik angusaqarpoq siorna ukiumi naatsorsuiffimmi 9,5 mio. kr.-inik angusaqarluni. Angusat pingaartumik anguneqarput taaneqareersunut umiarsuarnut takorniartaatinut, kilisaatinut allanullu ikummatissamik tunisaqarnikkut, akerlianillu – KNI-p inuiaqatigiinnut akisussaaqataanerata iluani – nunaqartunut atuisunut akit allanngorartinneqarsimanatik.
“Ikummatissat akii qaffatsaalioreerlutigit ikummatissap pisiarinerani akii naapertorlugit maj 2025-mi naleqqussarpavut. Ukiuni arlalinni atuuttussanik qulakeerinnittarnitsigut akit qaffatsinnaveersaartarpavut, ikummatissallu akiisa allanngorarfiisa nalorninartoqarnerullu nalaani qulakkeerinnittarnerput atuisunut iluaquterujussuisimavoq,” KNI-mi pisortaaneq, Jeppe Jensen, oqarpoq.
Nioqquteqarnermut ingerlatsivik akileraarutit akilinnginnerini 32,0 mio. kr.-inik sinneqartoorpoq siorna ukiumi naatsorsuiffimmi -95,7 mio. kr.-inik angusaqarluni. Angusat sunnerneqaatigivaat 2024/25-mi illuutit 67 mio. kr.-inik nalikillinerisigut aammali KNI-p 2025/26-mi aaqqissuussaanikkut naleqqussaaneratigut, aningaasartuutinik sukannersumik aqutsineratigut, nioqqutigineqartut allanngornerisigut kiisalu ammasarfiit naleqqussarnerisigut. Tunngaviusumik ingerlatsineq 54,0 mio. kr.-inik pitsanngoriartinneqarpoq.
“Nioqquteqarnermut ingerlatsivik ukiuni arlalinni atugassarititaasunik ajornartorsiortinneqartarsimavoq. 2025/26-mili ilorraap tungaanut ingerlalernermi niuernermik ingerlatatsinni nutarsaanermut digitalinngorsaanermullu aningaasaliissuteqarsinnaalerpugut. Tamanna isumaqarpoq ukiumi tullermi nukittuumik tunngavissaqarluartugut,” KNI-p pisortaanera, Jeppe Jensen, oqarpoq.
Pitsaasunik naatsorsuuteqarneq – sulilu ineriartornissamik pisariaqartitsineq
2024/25-mi allanngortitsinerit annertuut ingerlanneqartut 2025/26-mi nangeqqinneqarput, tamatumani pilersuinermi akisussaaffiup niuernikkullu ingerlatatigut pitsaanerusumik periusissiorluni oqimaaqatigiisitsinissamik pisariaqartitsinermik takutitsiviulluni.
KNI-p 2025/26-mi angusanut sanilliullugu aappaagu ikinnerusunik angusaqarnissani naatsorsuutigigaluarlugu sinneqartoornissani naatsorsuutigaa, tassami nioqquteqarnermut ingerlatsivimmi aningaasartuutit amerlanerunissaat ikummatissaqarnermilu ingerlatsivimmi aserfallatsaaliinermut aningaasartuutit amerlanerunissaat naatsorsuutigineqarmat.
2026/27-mi akileraarutit akilinnginnerini 100-125 mio. kr.-inik angusaqarnissaq naatsorsuutigineqarpoq.
“2025/26-mi sinneqartoornitsigut pigisatta nalillit aningaasaliivigisariaqartut aningaasaliiviginissaat naatsorsuutigaarput, taamalu ililluta sulisunut pisisartunullu tunngatillugu suli pitsaanerusunik atugassaqartitsinissatsinnut tunngavissiilluta. Tamakkununnga ilutigitillugu KNI-p ineriartortinneqarnissaanut sulinerput ingerlatiinnassavarput taamalu ililluta nunatsinni pilersuiinnarsinnaalluta angusaqarluarnerusinnaallutalu. Aamma inuiaqatigiit atugassarititaasullu allanngoraluarpataluunniit,” KNI-mi pisortaaneq, Jeppe Jensen, oqarpoq.
Itinerusumik paasisaqarumagaanni pisortaaneq, Jeppe Jensen, oqarasuaammut 52 36 16-imut sianerfigineqarsinnaavoq.
Uani naatsorsuutit takukkit.
