Seqinertut aappilatigisoq sermitullu qaqqoritsigisoq

Johannes Ujo Müllerip Isiginnaagassiatut piviusulersaarusiaa nunatsinni erfalasutta 2025-mi ukiuni 40-nngortorsiorneranut atatillugu suliaraa, piviusulersaarullu ullortunersiornermi ulloq 21. juni KNR-ikkut takutinneqarpoq.

Johannes Ujo Müller ukiuni aqqanilinni KNI-mi filmiliornermik, assiliinermik attaveqaqatigiinnermilu sulivoq. Taamatullu sulinermini illoqarfiit nunaqarfiillu amerlanerit tikinnikuuai, nunatsinnilu nunat immikkoortuini assigiinngissutsit ilisimaarilluarpai – aammali suna ataatsimooruttarneripput, ilisimasaannullu Erfalasutsinnut tunngapput.

– 80-ikkunni Kangaatsiami peroriartorpunga, Kangaatsiamilu illoqarfiit nunaqarfiillu allat assigalugit atorluarneqartunik erfalasulerfippaaloqarpoq. Sapaatit, inuuissiortoqarnerit, katittoqarnerit, ilisinerit, ullorsiorfiit nalliuttullu tamaasa erfalasoq amusarparput soorluttaaq nunatsinni angerlarsimaffippassuit amusaraat. Mikigallarama Dannebrog amuneqartarpoq, 1985-imi ataataga angerlaleriallarami nutaamik erfalasusisimalluni, Erfalasorput, kingorna taanna kisiat amuneqartalerpoq. Nunatsinni qanoq ittumik erfalasoqarnissarput oqallisaallarmat ukiukippunga, taamaattumillu malinnaananga. Eqqaamaannarparali kusagisorujussuullugu. Dannebrogimiit allaanerugaluaqaluni qalipaatai assigai – tassami aappalaartoq qaqortorlu qilammut tungutsorissup tungaanut isigalugu kusagiuaannarnikuuara.

– Erfalasutta amunerani nuannaarnermut, ataatsimoornermut pingaartorsiornermullu attuumatittuaannassavara. Nalliuttuni ullorsiorfinnilu malunnartitsinermi erfalasutta amunissaa anaanama pingaartittuaannarnikuuaa. Anaanama erfalasumut isummersimanera tunngavigalugu erfalasorput meeraaninnut ilaalluinnarpoq. Erfalasup ataqqillugu pineqarnissaa siusissukkut ilikkarpara – qanoq tigummineqassanersoq qanorlu atugassaanersoq, ullup qanoq ilinerani amuneqartassanersoq qaqugukkullu peerneqartassanersoq, tamakkukujuit. Erfalasutta immikkuullarinnera siusissukkut paasivara: Nunatsinnut ilisarnaataasoq.

– Ukiut 40-ngajaat qaangiuttullu Erfalasorput filmeeraliariniarlugu 2024-mi isumassarsivunga, taamaattumillu Kattuffik Erfalasutta siulittaasuat, Kâlêraq Bech, attavigaara erfalasup nalliuttorsiornissaanut atatillugu filmiliornissara soqutigineraat aperalugu. Akuerseriarmat aqaguani Tips og Lottomut taperneqarnissamik qinnuteqarpunga. Aningaasartuutitta amerlanersai Tips og Lottomiit tapiissutinit akilerneqarput, filmiliornerpulli aamma Qeqqata Kommunianiit Inatsisartuniillu taperneqalaarpoq.

– Suliara sunngiffinni annertuumik suliaraara, qaammatini sisamani sunngiffinni sulinngiffeqarninnilu apersuinermut, immiussinermut katiterinermullu atorpakka. Suliarujussuuvoq, aammali sammisap paasiniaaffigeqqissaarnera assorsuaq soqutiginarluni.

– Isiginnaagassiatut piviusulersaarusiama nunatta avataani taamarsuaq maluginiarneqarsimatiginera nuannaarutigeqaara, aammali soqutiginninnerup nunat akornanni politikkimut kiisalu Amerikami naalakkersuinermik suliallit nunatsinnik persarinninneranut tunngammat ilisimaarilluarlugu. Tassunga tunngasortaa piviusulersaarusianni ilanngunniarnagu aalajangernikuuvunga, tassami Amerikami naalakkersuinermik suliallit politikkiannut akissutitut piviusulersaarusiara atorusunnginnakku. Piviusulersaarusiara nunatsinni ataatsimoorussatsinnut nersorinninneruvoq, tassalu Erfalasorput.