Signe naapeqqaarlugu maluginiagassat siulliit tassaasarput, ataatsimuussusermut suleqatigiinnissamullu ataqqinninnera, tunniusimaneralu. Niuertutut sulinermini aqutsisutut aammalumi inuunermini naleqartitaminik aallussilluarnera assut ersarippoq. Signep suliffimmini upperilluinnarpaa anguniakkat kusanartut ataatsimoorluni angusassaasartut – kisimiinnani.
Signe sullissilluarnissaminut pimoorussiuaannarpoq, sullitat pitsaasumik misigisaqarnissaat aammalu inuiaqatigiinnut naleqassusermik pilersitsinissaq pingaartillugu. Niuertutut atorfini aqutsisutut inissisimaffiinnartut isiginngilaa, aammali sullitat pisariaqartitaat qitiutillugu sulineq siunertaralugu. Pitsaasumik angusaqarnissamik ujartuiuarnerata sulisut pitsaanerpaamik tunniussaqarnissamik kajumilersittarpai.
Signep naleqartitaasa pingaarnerit ilagaat naligiinneq, ” Tamatta naligiinnerput ersersikkusuttuaannartuuara”. Sulisut isiginiarneqarlutillu maluginiarneqarlutik misiginissaat pingaartitaasa ilagaat, sulisullu suliaasa siuarsarnissaat piareersimaffigiuaannarlugu. Signep eqaatsumik eqqissisimasumillu suliffimmik pilersitsinissaq pingaartitaraa, sulisut piginnaasaminnik siuarsaallutillu atugarissaarnerussammata.
Nutaamik eqqarsarnerup qanoq nutaanik periarfissanik ammaasarneranut Signe takussutissaalluarpoq. Niuertunngunngikkallarami qatserisartuusimavoq peqatigiiffilerisarsimallunilu, taakkuuppullu akisussaaffeqarnermik suleqatigiinnermillu ilinniarfigisimasai. Ullumikkut taakku misilittakkat aqutsisuunermini nutaaliornermut atorluartarpai. Ineriartornerup piumassuseqarluarnermiik aammalu siumut isiginnissinnaanerminngaanneernera upperivaa. ”Ilisimajuaannarsimavara angorusutaq upperigaanni kusanartumik inerneqassasoq”.
Signemut suleqatigiinneq oqaasiinnaanngilaq, suliaanummi toqqammaviliisuuvoq. Suliffimmini aammalu sinerissami suleqatigiinneq nuannarilluinnarpaa, suliffeqarfimmi suleqatinilu ikorfartoqatigiinniarlutik aammalu isumassarsioqatigiinniarlutik naapikulaartaramik. Signe coach-erisuunini nunaqarfinni tikeraarnermini atorluartarpaa. Sulisut imminnut qiviarsinnaallutillu suliassami paasilluarnissaat pingaartitarivaa. Coach-erisarnini annertuumik oqaloqatigiinninnermi atortarpaa, siunnersuinngikkaluarluni nammineq takunnilernissaq pingaartitaralugu. Sulisut naapikulaarneri qanimullu attaveqarfigineri ataatsimoornerup nukittorsarneranut sakkutut atorluartarpai. ”Suliffiguna nuannaralugu nukissamik aallernartoq, tassa uanga NUKISSAMIK annertuumik aallerfigisartagara ”qasuersaarfigisartagaralu””.
Signep imminut paarinissaq aamma pingaartitaraa, pinngortitamiittarnermini ilaquttamilu ilagisarnerini eqqissisimaartarpoq nukissanillu aallerluni, taamaasiortarneratalu aqutsisutut tunniusimanissaanut nukissaqartippaa. Inuunermi suliffiup sunngiffiullu oqimaaqasigiisinneratigut aamma maligassiuisuuvoq, taamasiornerminimi takutittarpaa, anguniagaqarneq imminullu paarineq ataatsikkut aallunneqarsinnaasut.
Signep naleqartitani tunniusimasuuninilu atorlugit suliffik sullitanut sulisunullu nalertinneqartutut misigisimaffik pilersittarpaa. Aqutsisutut ingerlanera tamanut ataatsimoorneq, akisussaassuseqarneq, nutaamik eqqarsarneq aammalu sullitat pisariaqartitaat toqqammavittut ukkataralugit sulerusuttunut takussutissaavoq.