Suliffigissallugu nuannersoq

13-06-2023

KNI-mi suliffimmik nuannarisaqarneq pingaartipparput. Suleqatittami suliffeqarfimmut ilaasutut misiginissaat pingaartuuvoq. Suliffiullumi isumaqarluarlunilu ilikkagaqarnarnissaa pingaartuuvoq. Taamaattumik suleqatitta suliffimminnik nuannarinninnerat ataavartumik misissugaraarput. Suliffimmik nuannarisaqarnikkkut, suliap imaqassusiatigut, ilikkagaqariartornikkut, inerikkiartornikkut suleqatigiinnikkullu nuna tamakkerlugu agguaqatigiisitsinermit qaffasinneruvugut. Soorunami tamanna tulluusimaarutigaarput.

Suliffimmik nuannarinnilluarneq tatiginassuserlu

Suliffimmik nuannarinninneq: Qaffasissuseq 82. Kalaallit Nunaanni suliffiit allat agguaqatigiisillugu: Qaffasissuseq 77.

Tatiginassuseq: Qaffasissuseq 87. Suliffiit allat Kalaallit Nunaanni agguaqatigiisillugu: Qaffasissuseq 82.

Suleqatitta suliffimminnik naammagisimaarinnissusiannik misissuineq (MTU) Ennova-mit ingerlanneqartarpoq. Taanna ukiunik 30-nik tamakkuninnga misilittagaqarfiugami naliminik siuarsimasuuvoq. Ennova piginnaaneqarneratigut toqqarparput aammalumi Kalaallit Nunaanni suliffeqarfiit allat MTU atorlugu sullittarmagit. Taamaalilluta angusatsinnik toqqaannartumik suliffeqarfiit allat agguaqatigiisinnerinut naleqqersuussinnaanissatsinnut toqqammavissaqaleratta.

Ennova 1-imiit 10-mut pointilersuisarpoq qaffasissuserlu 0-imiit 100-mut nalilertarlugu

Qaffasissumik naliliineq: 75-100 point

Akunnattumik naliliineq: 60-74 point

Appasissumik naliliineq: 0-69 point

Suliffimmik nuannarissutsikkut tatiginnissutsikkullu nalilissagaanni KNI kalaallit suliffeqarfiini qaffasinnerpaat akornanni inissisimavoq. Apeqqutigineqartuni tamangajalluinnarni KNI 1-ip 6-illu pointit akornanni suliffeqarfinnit allanit pitsaanerusutut agguaqatigiisitaniit qaffasinnerusarpoq. Misissuineq ataani atuaruk.

KNI suleqatinut tunngavoq

Siunissaq ataatsimoorupparput

Suleqatigut pikkorissut ilaginagit nuna tamakkerlugu suliassat ullut tamaasa naammassisakkagut sapissagaluarpagut. Tamarmik pikkorriffimminnik suliarerusutaminnillu suliaqarnermikkut tapersersueqataapput. Taamaammat ataatsimut nukittuvugut. Assigiinngissuserpummi nukissaqarfigaarput. Tamanna pillugu filmimi ataaniittumi annertunerusumik tusagaqarsinnaavutit.

Nikolaj Svendsen ilisaritillugu

“Aqerluusaannarsornerup nalaaneersuuvunga”.

14-inik ukioqartunga Kangersuatsiami niuertorutsip KGH-p pisiniarfiani ulloq 1. april 1967 misilinneqarlunga atorfinitsippaanga. Ullut tallimat qaangiutiinnartut pisiniarfimmi sulilivippunga – maannakkut ukiut 56-it ingerlareersut suli KNI-mi atorfeqarpunga. Oqarsinnaavunga, suliffeqarfinni allani sulerusulernikuunngisaannarpunga.

Kangersuatsiami pisiniarfik taamani pisiassanik nammineq tigooraalluni pisiniarfiunngilaq kisianni pisiniartitsiviup saanut qeqqilluni pisiassanik tikkuartuisoqartarpoq, nioqqutissallu tikki tipigissut tamarmik naamaneqarsinnaallutik. Kaffet, paarnarsuit qaqortut, tupat, qisuit allunaasallu – aah, tipigersuaq. Pisiniat pisiassaminnik tikkuartuisarput pisiassaallu uagut isaassortarpavut. Ameerniutaat aamma pisiarisarpavut. Sunannguaq tamarmi aqerluusamik allattoqqissaarneqartarpoq. Taamaattumiguna oqartartunga: Uanga ujaraannarnik sakkoqarnerup nalaaneersuunngilanga – uanga aqerluusaannarmik atortoqarallarnerup nalaaneersuuvunga.

Atuaruk