Aviisitigut neqeroorutit naqitertarunnaarpagut

Ullumikkut nunatsinni inersimasut 94 %-ii smartphoneqarput, qanorluunniillu attaveqaqatigiinnermut, aliikkusersornermut niuernermullu atorluarneqartarluni – aamma ukioqqortunerusut atortarpaat. Taamaattumik neqeroorutit aviisitaat naqitat atorunnaarnissaat pissusissamisuuginnarsimavoq mingutsitsinnginnerusumullu nuulluta: Aviisitigut neqeroorutit digitaaliusut.

Pilersuisumi neqeroorutit aviisitaat 9. septemberimiit tamakkiisumik digitalinngorput. Neqeroorutit aviisinngorlugit naqitertarunnaarpagut pisisartullu mobilimikkut, tabletsimikkut qarasaasiamikkulluunniit sukkulluunniit takusinnaasaannik taarserpavut. Aviisip digitalinngorneratigut sapaatip akunnerani neqeroorutit malinnaavigiuminarsipput ilaatigut isumassarsiorfiusinnaasunik nerisassiornermilu ilitsersuutinik iserfigineqarsinnaasunik ilanngussisoqartassalluni.

Taamaalilluni Pilersuisoq nunatsinni nioqquteqartuni aammali naalagaaffeqatigiinnerup iluani siullersaalluni digitaliusumik aviisitaarpoq.

Piujuartitsinissamik iliuuseqarneq
Neqeroorutit aviisitaasa digitalinngortinnerat pisisartunut torraaneruvoq atoruminarnerullunilu. Avatangiisimik piujuartitsinissamut aqqutissaavoq, tassami neqeroorutit aviisitaat pappiarartorfiunngilaq pisiniarfinnullu assartorneqartussaanani. Taamatut neqeroorutit aviisitaannik suliaqartalerneq eqaanneruvoq ullutsinnullu naleqqunnerulluni, taamalu neqeroorusiortarneq avatangiisimik mianerinniffiulluni.

Ulluinnarni digitaliunerusumik atuinermut tikilluarit
Neqeroorutitta aviisitaat digitaliusoq pisisartutsinnit tigulluarneqarpoq. Pisisartut 86 %-iisa aviisiliarisartagarput mobilimikkut takusarpaat. Digitaliunera iluatsillugu paasissutissat pissarsiarisinnaavagut aviisilu suli pitsanngorsartuarlutigu. Aviisip digitalinngortinneraniit qaammatini siullerni atuisut alakkaasartut 76 %-iisa aviisi tamaat atuartarpaat. Tamannalu naammagisimaarluinnarparput.

Atuisugut qanorluunniit ukioqaraluaraangamik aviisi digitaliusoq atortarpaat.

Atuisutta suiaassusaat assigiimmik aveqqapput. Atuisuvut 45-niit 54-inut ukiullit amerlanersaapput. Atuisut 65-it sinnerlugit ukiullit ikinnerupput, taamatummi ukiullit nunatsinni innuttaasut 10 %-iinnarimmatigit neqeroorutitta aviisitaannik atuisut taakku assut amerlapput.

KNI-mi suleriutsitsinnik digitalinngorsaanermi pisariillisaanermilu neqeroorutitta aviisitaasa digitalinngortinneqarnerat aamma suliniutinut ilaavoq. Taamatullu suliniuteqarnitsinnut atatillugu assigiinngitsutigut iluarsiissuteqartarnigut pisariinnerusumillu pissarsiarinnissinnaatitsinerput pitsanngorsaavigiussavarput.