KNIp ukiumoortumik nalunaarutaata 2024/25-mut tunngasup takutippaa KNI akileraarutit akilinnginnerini 75 mio. koruuninik amigartooruteqartoq. Angusaq naammaginanngilaq aamma ukioq inuiaqatigiinni allannguutinit annertuunit sunnerneqarsimasoq takuneqarsinnaavoq, ilaatigut inuit illoqarfinnut nutserneri, nutaamik attaveqaasersueriaaseq inatsisitigullu atugassarititaasut allanngorneri, ingammik nioqquteqarnermik ingerlatsivimmut annertuumik sunniuteqarput.
“KNI-mi ilungersuutigisimavarput kiffartuussinissamik isumaqatigiissutitta kiisalu aningaasaqarnitta patajaatsuunissaata oqimaaqatigiissumik inissisimanissaa. KNI A/S-imi 2024/25-mi angusat ersarissumik takutippaat, inuiaqatigiinni aaqqissuussaanikkut allannguutit annertuumik sunniinerlunnerat naammattumik pakkersimaarsinnaasimanngikkipput. Tunngaviusumik isummerfigineqartariaqarpoq, illoqarfiit, nunaqarfiit inoqarfiillu isorliunerusut qanoq kiffartuunneqassanersut – KNI-mi ilutsinni pingaarutilinnik isumaliuutissaqarpugut aammalu Namminersorlutik Oqartussat peqatigalugit, KNI-mi Pisortaaneq Jeppe Jensen oqarpoq.
Nioqquteqarnermik ingerlatsivik: Inuiaqatigiinni aaqqissuussaanikkut allannguinernit annertuumik sunnerneqarpoq
Nioqquteqarnermik ingerlatsivik 92 mio. koruuninik amigartooruteqarpoq. Amigartoorutit annersaat nioqquteqarnermik ingerlatsiviup sanaartugaataanik/illuutaanik nalikilliliinermit pipput, nalikilliliinerimmi angusat 67 mio. koruuninik ikilisippaat.
Ukiup ingerlanerani niuernermi atugassarititaasut ajornerusumut allanngorujussuarput.
Ilaatigut poortuutissat pillugit nalunaarutip nutaanngorneratigut kaaviiaartitat 100 mio. koruuninik arlalinnik ikileriarput, tamatumalu saniatigut nunatsinni nutaamik attaveqaasersueriaaseq, akitsuuteqanngitsunik tuniniaanerup annikillinera minnerunngitsumillu inuit illoqarfinnut nutsernerisa ingerlaannarnerat, ukiumut angusanut sunniuteqarput.
Ikummatissaqarnermik ingerlatsivik: Pissutsit unammillernaraluartut angusat pitsaasut
Ikummatissaqarnermik ingerlatsivik 16 mio. koruuninik sinneqartoorfiuvoq, ukiulli siuliinit sinneqartoorutit ikinneroqaat. Angusat annikinnerinut patsisaavoq ukiut siuliini akit qaffatsaalinerisa atorunnaarsinneqarneri, atuisunullu akit aalaakkaasuutinnissaasa aalajangiunneqarsimaneri. Taakku ilutigalugit ikummatissaasivinnut annertuumik aamma pilersuinermut isumannaallisaanermut aningaasaliisoqarpoq, taakkulu nunatsinni attaveqaasersueriaatsimut nutaajusumut ikorfartuipput.
Ikummatissaqarnermik ingerlatsivimmi angusat ukiut siuliinit annikinneroqaat, tassami KNIp atuisunut akigitinneqartup aalaakkaasuunissaa, Naalakkersuisut isumaqatigalugit aalajangiullugulu toqqarsimavaa atuisunut iluaqutaasumik – aalajangerneq 2024/25-mi katillugit akinut 120 mio. koruuninik akikinnerulersitsisoq. Taakkunannga akitsortitsinaveersaartitsineq 70 mio. koruunit missaannik naleqarpoq ukiullu siuliini sinneqartoorutinit aningaasalersorneqarpoq, Namminersorlutik Oqartussanik kiffartuussinermut isumaqatigiissutigineqartumik sinneqartoorutissatut anguniakkat 50 mio. koruuninik ikilisinneqarput. Taamatut aalajangersaasimanerup kinguneranik KNIp ingerlatsinermi angusai, aningaasat pineqartut amerlaqataannik appasinnerulersippai.
Naleqqussarnerit pisariaqartut pilersaarusiornermilu suliniutit
Inuiaqatigiinni aaqqissuussaanikkut allanngortoqarnerani KNI-mi naleqqussaanerit pisariaqartut aamma pilersaarusiornermi qanoq iliuuseqarnerit arlallit aallartinneqarput.
Pisortaaneq Jeppe Jensen oqaaseqarpoq:
”Ikummatissaqarnermik ingerlatsivimmi ukiut siuliini sinneqartoorutit akit qaffatsaaliornerannut atorneqarnermikkut nungussimalerput. Taamaattumik isertitat pisariaqartut qulakkeerniarlugit upernaaq ikummatissat akii naleqqussarsimavagut. Tamanna ilutigalugu nioqquteqarnermik ingerlatsivimmi naleqqussaavugut, aamma suliffeqarfimmik ingerlatsinitta aningaasaqarnikkut oqimaaqatigiinnerusumik ineriartortinnissaa siunnerfeqarluartumik sulissutigineqarpoq, inuiaqatigiit katitigaanerat sumiiffimmi aalajangersimasumi inuttussutsip allanngoriartornera kiisalu nutaamik attaveqaasersueriaaseq eqqummaariffigalugit. Pilersaarusiornermi suliniutit pisariillisaanerillu arlallit atorlugit 2025/26-mi 50 mio. koruuninik sinneqartoornissaq angusinnaassavarput, taakkulu siunissami suliffeqarfimmi pisariaqartitanut aningaasaliinissamut tunngaviliisuussapput.”
Ukiumoortumik nalunaarut 2024-2025 uani atuaruk.
